د نړۍ په ګوټ ګوټ کې په زرګونو پښتنو د پاکستان د وروستي اقدام په غبرګون لاریونونه کړي دي. له اروپا نیولې تر امریکا او له اسلام اباد نیولې تر مزارشریف ښار پورې زرګونو افغانانو د پاکستاني حکومت پر ضد لاریونونه کړي دي او د منظور پښتین د خوشي کېدو غوښتنه یې کړې ده. له دې سره هممهاله د پاکستان حکومت نه یوازې دا چې ښاغلی پښتین خوشی نه کړ، بلکې د پښتون ژغورنې غورځنګ ډېر نور غړي یې هم نیولي دي. پاکستان وايي، دوی غوښتل په ښارونو کې لاریونونه وکړي او خلک وپاروي.
دری ورځې کېږي چې پاکستاني حکومت په سیمه کې د یوه ستر مدني او ټولنیز حرکت مشر منظور پښتین نیولی دی. د پښتون ژغورنې غورځنګ دغه مشر وړمه ورځ پاکستاني حکومت له خپلو څو نورو ملګرو سره ونیو، خو ملګري یې خوشي کړل او په خبره یې، دی به محاکمه کوي. پاکستانی حکومت تور پورې کوي چې منظور پښتین د پاکستان پر اساسي قانون نیوکه کړې ده او هغه یې نیمګړی بللی دی. تېره ورځ د غورځنګ مشرانو پاکستاني حکومت ته د منظور پښتین ضمانت وړاندې کړی، خو محکمې رد کړ او په خبره یې، دی به په دېره اسماعیل خان کې یوه زندان ته بیايي.
د پاکستاني حکومت د دغه اقدام په غبرګون کې د نړۍ په ګوټ ګوټ کې غبرګونونه وپارېدل. د سیمې ډېرو سیاستوالو او مشهورو شخصیتونو د پاکستاني حکومت دا کار وغانده. پخواني ولسمشر حامد کرزي، ولسمشر غني، په پښتونخوا کې ډېرو سیاستوالو او سیاسي بهیرونو د پاکستان پر دغه کار نیوکه وکړه. د بښنې نړیوال سازمان بیا له پاکستان وغوښتل چې ژر تر ژره دې منظور پښتین خوشی کړي. د دې تر څنګ، د بشري حقونو نړیوال سازمان بیا منظور پښتین یو سوله ییز مبارز یاد کړی دی او له پاکستاني حکومته یې غوښتي چې پر هغه لګېدلي تورونه واخلي او ژر تر ژره یې دې له بند خوشی کړي.
بلخوا د نړۍ په نږدې ۳۰ ښارونو کې د منظور پښتین د خلاصولو په ملاتړ او د پاکستاني حکومت د غندنې په موخه، اعتراضونه وشول او لا روان دي. په اسلام اباد او پېښور کې سخت لاریونونه وشول. د همدې لاریونونو په غبرګون کې پاکستاني حکومت د پښتون ژغورنې غورځنګ مشر محسن داوړ او لسګونه نور لاریون کوونکي یو ځای نیولي دي. محسن داوړ په ټولنیزو رسنیو کې په خپره شوې ویډیو کې د پاکستاني حکومت دغه کار غندلی دی. هغه ویلي: «پاکستانی حکومت د غږ چوپ کولو په لټه کې دی، دوی زموږ غږ نه شي اورېدلی، نو مجبور یو چې پر نورو لارو غور وکړو.»
د پښتون ژغورنې غورځنګ غړي وایي، پاکستانی حکومت دې ژر تر ژره د دوی مشر منظور پښتین ازاد کړي. د دغه غورځنګ غړې ثنا اعجاز وایي، د پاکستان عرض او ثبت شوې قضیه بې بنسټه ده، نو په بېلو بهانو دې د ازادۍ غږ نه چوپ کېږي. نوموړې وايي: «منظور پښتین خو د یوه لوی غورځنګ مشر دی، پر قانون خو ان عادي وګړي هم نیوکه کولی شي. هر وګړی حق لري چې د قانون په اړه نظر ورکړي، دا دلیل موجه نه دی، مشر دې ازاد کړل شي».
د نړۍ په ګوټ ګوټ کې لاریون کوونکو هم پر پاکستاني حکومت غږ وکړ، چې ژر تر ژره دې منظور پښتین خوشی کړي. دوی دغه راز پر نړیوالو حقوقي او بشري بنسټونو غږ وکړ چې د پښتون ژغورنې غورځنګ غږ واوري او د پاکستان د غیر قانوني او غیر انساني کړنو پر وړاندې اقدامات وکړي.
لاریونونه له کابل، کونړ، جلال اباد، خوست، پکتیکا، کندهار او مزار پيل شوي دي او په نورو ښارونو کې به هم دوام وکړي. په کابل کې لاریون کوونکي وایي چې پاکستانی حکومت د نړیوالو قوانینو پر خلاف د بیان ازادۍ ته درناوی نه لري او نړیوالو ته پکار ده چې د دغه ظالم او خونخوار رژیم پر وړاندې قانوني اقدامات تر سره کړي.
