محمود صیقل: د ایران او امریکا کړکېچ به د سولې پروسه له ځنډ سره مخ کړي

د افغانستان د ستراتیژیکو مطالعاتو انسیټیټیوټ د یوې ناستې پر مهال پر افغانستان باندې، د ایران او امریکا تر منځ د را ولاړ شوي کړکېچ تاثیرات وڅېړل. په ملګرو ملتونو کې د افغانستان پخواني استازي محمود صیقل دې غونډې ته د خبرو پر مهال وویل، که د ایران او امریکا ترمنځ کړکېچ زیات شي دا اندېښنه شته چې، افغانستان به د دواړو هېوادونو ترمنځ د رقابت پر ډګر بدل شي. نوموړی وايي چې د امریکا او طالبانو ترمنځ د روانو مذاکراتو په جریان کې باید ایران د افغان سولې پروسه کې دخیل شي، او امریکا باید دغه چینل ایجاد کړي. څېړونکي باور ښيي چې په افغانستان کې د امریکا او ایران عمومي ګټې د تقابل نه، بلکې د ګډو ګټو، ترهګرۍ ضد مبارزې، نشيي توکو او افراطیت څخه د مخنیوي لپاره ضروري دي او د افغانستان د ثبات تهدیدېدل د ایران په ګټه نه دي.