د سولې له خبرو سره هممهاله خونړۍ جګړې په افغانستان او سیمه کې اندېښنې راولاړې کړې دي. سیګار تازه په یوه راپور کې ویلي چې طالبانو هم د سولې خبرې مخ ته وړې، خو هم یې د جګړې په ډګر کې د نورو کلونو په پرتله تاوده او ډېر فعالیتونه لرل. بلخوا مشهوره نړیواله ورځپاڼه ډيلي بېسټ بیا په یوه مطلب کې لیکي، چې پر طالبانو درانه هوایي بریدونه هم کېدل، خو بیا هم دغه ډله بریالۍ وه او دا د امریکا د ناکامۍ په مانا دي. بلخوا داسې راپورونه هم خپاره شوي چې د سولې خبرې تر نامعلومې نېټې ځنډېدلې دي او خلیلزاد هم له اسلام اباده کابل ته راستون شوی دی.
بهرنیو او افغان هوايي ځواکونو په وروستیو ورځو کې هوايي بریدونه ډېر کړي چې له امله یې د ملکي وګړو مرګ ژوبله لوړه شوې ده. دوی پر دې باور دي چې په دې توګه کولی شي وسله وال طالبان وځپي، خو تازه بهرنۍ رسنۍ وایي چې هوایي بریدونه یوازې ملکي تلفات اړوي او د وسله والو طالبانو په ځپلو کې ګټور نه تمامېږي.
ډيلي بېسټ نشریې په دې اړه یو اوږد مطلب خپور کړی دی. سرچینه په خپل مطلب کې وایي چې امریکايي چارواکي په تېره ډونالډ ټرمپ په افغانستان کې ناکام و او ۲۰۱۹ ز کال د طالبانو لپاره ګټور کال و. په مطلب کې راځي چې پر طالبانو د امریکايي ځواکونو هوایي بریدونه هم ډېر شوي وو، خو دې ډلې ډېر بریدونه تر سره کړل او د جګړې ډګر یې هم تود ساتلی و، نو ځکه هوایي بریدونه ګټور نه دي. سرچینه کاږي چې طالبانو په خپلو بریدونو او نښتو کې ۲۳ امریکايي نظامیان وژلي او ۱۹۲ نور یې ټپیان کړي دي.
متقاعد امریکايي جنرال کرېس کولنډا هم د امریکا پر جګړه ییزه ستراتيژي نیوکې کړې دي. هغه ویلي: «امریکا په افغانستان کې هوايي بریدونه ډېر کړل، ټرمپ پخپله دا وغوښتل، دوی فکر کاوه چې په دې توګه به طالبان وځپي یا به یې د سولې خبرو ته وهڅوي، خو دا کار ناکام و، جګړه ییزه تګلاره ناکامه ده.»
دغه امریکایي جنرال ټینګار کوي چې د جګړې پر ځای د سولې خبرې مثبت بدلونونه راوستلی شي. د هغه په خبره، امریکایانو که د جګړې او له نظامي لارو افغان کړکېچ حل کولی شوای، نو هغه مهال به حل شوی و چې واشنګټن په افغانستان کې ۱۰۰ زره سرتېري درلودل. هغه ټینګار کوي چې د امریکا او طالبانو تر منځ خبرې باید پایلې ته ورسول شي او په دې توګه دې د امریکا اوږده جګړه پای ته ورسېږي. کولنډا وايي: «اوس باید په ډيپلوماټیک ډګر کې موږ بریالي شو. جګړه نتیجه نه ورکوي، هوایي بریدونه پایله نه لري، دا کار جګړه لا اوږدوي او د هېچا په ګټه نه ده.»
بلخوا ډيلي بېسټ لیکي چې د امریکا جګړه ییزه تګلاره په افغانستان کې نه یوازې د جګړې په ډګر کې ناکامه وه، بلکې د عامو افغانانو پر ژوند یې هم پوره منفي اغېز کړی دی. د سرچینې په خبره، په افغانستان کې نږدې پنځوس سلنه وګړي غذايي مصونیت نه لري، په کور د ننه کډوالي ډېره شوې ده، د ملکي وګړو مرګ ژوبله اوج ته رسېدلې ده او هر افغان له شته ناامنۍ ځورېږي.
له دې راپورونو سره هممهاله د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد کابل ته راغلی دی. سرچینو یې د راتګ خبر تایید کړی دی او ټاکل شوې چې له افغان سیاسیونو سره پر سوله او روان بهیر خبرې وکړي. بلخوا طالبانو بیا ویلي چې د امریکا د نوو او ډېرو غوښتنو له امله د سولې خبرې تر نامعلومې نېټې ځنډېدلې دي. د طالبانو د قطر دفتر ویاند سهیل شاهین وايي، چې دوی د تاوتریخوالي کمولو ته تیار دي، خو د امریکا غوښتنې ډېرېږي او نوې کېږي.
د افغان جګړې او سولې په اړه داسې مهال دغه راپورونه خپرېږي چې په دې وروستیو کې په بېلو ولایتونو کې هوايي بریدونه ډېر شوي او د ملکي وګړو مرګ ژوبله لوړه شوې ده. په بلخ، کندوز، وردګو او ځینو نورو ولایتونو کې دغو بریدونو عامو وګړو ته مرګ ژوبله اړولې چې سخت غبرګونونه یې هم پارولي دي.
