د سولې د خبرو له ګونګ بهیر سره هممهاله طالبانو د امریکا ځینو ادعاوو ته غبرګون ښودلی دی. طالبانو ویلي، دوی سولې ته تیار دي او د ستونزې د حل لپاره قوي اراده لري، خو امریکا په دې برخه کې له ستونزو سره مخ ده. د طالبانو ویاند ذبیح الله مجاهد په یوه ټوېټ پیغام کې ویلي چې په افغان حکومت کې سیاسي اختلافاتو هم دغه بهیر ټکنی کړی او د هوکړې په لاسلیک کې یې خنډونه جوړ کړي. د امریکا د بهرنیو چارو وزیر مایک پامپیو بیا وایي، دوی به اجازه ور نه کړي چې طالبان افغانستان بې ثباته کړي او د یوې باوري هوکړې لاسلیک ته په تمه دي.
د امریکا د بهرنیو چار وزیر ازبکستان ته سفر کړی و او هلته یې له دغه هېواده د سولې په برخه کې د همکارۍ غوښتنه کړې ده. دا یې هم ویلي چې افغانستان پرمختګ ته اړتیا لري، نو د ازبکستان مسوولیت دی چې تر خپلې وسې په دې برخه کې همکاري وکړي. له دې سره جوخت یې د افغان سولې په اړه هم خبرې کړې دي. نوموړي په خپلو خبرو کې ویلي وو، طالبان باید دا ضمانت ورکړي چې دوی د جګړو د کنټرول، اوربند یا تاوتریخوالي د کمولو وړتیا لري. د پامپیو په خبره، دوی ډاډه نه دي چې طالبان به وکولی شي چې د جګړې میدان کنټرول کړي او که نه.
هغه همدا راز ټینګار کړی چې بهرني ځواکونه به له افغانستانه وځي، خو اجازه به نه ورکوي چې طالبان دغه هېواد یو ځل بیا بې ثباته کړي. نوموړي د ازبکستان له دولتي ټلوېزیون سره په خبرو کې ویلي وو، دوی غواړي ډاډ تر لاسه کړي چې افغانستان ته دایمي سوله او دایمي ثبات راتللی شي. پامپيو زیاته کړې: «موږ خپل سرتېري له افغانستانه وباسو، خو د سرتېرو تر وتلو وروسته د دې اجازه نه ورکوو چې د افغانستان وضعیت خراب شي. ګواښونه شته دي، خو غواړو ډاډ تر لاسه کړو چې دلته دایمي سوله راتللی شي.»
پامپیو د سرتېرو د شمېر کمولو خبره هم کړې ده، خو وایي، دا بهیر به داسې نه وي چې په افغانستان کې امنیتي ستونزې جوړې کړي. پامپیو بیا په وروستیو څرګندونو کې د افغانستان په سوله کې د ګاونډیو هېوادونو رول هم مهم بللی و او د سیمې پر هېوادونو یې غږ کړی و چې د جګړې په له منځه وړلو کې پوره همکاري وکړي.
طالبانو د پامپیو پر دې څرګندونو غبرګون ښودلی دی. د طالبانو ویاند ذبیح الله مجاهد وايي، دوی د ستونزې حل ته لېواله دي او د دې کار وړتیا لري. د مجاهد په خبره، طالبان پر خپلو ژمنو او کړو خبرو ولاړ دي، خو امریکا کاواکه ده او نوي نوي شرایط وړاندې کوي. مجاهد زیاتوي: «موږ د مشکل د حل اراده او توان لرو، د مذاکراتو بهیر د ټرمپ ټوېټ، د امریکا متعددو غوښتنو او په کابل او امریکا کې د چارواکو اختلاف ټکنی کړی دی.»
طالبان د مذاکراتو د ځنډ یو بل ستر لامل د افغان او امریکايي حکومت د چارواکو تر منځ د نظر اختلاف بولي. مجاهد امریکا ملامته کړې چې ګواکې خپله ملامتي پر دوی اچوي. د ده په خبره، طالبان خپلو خبرو ته ژمن دي او دریځ یې د امریکايي لوري په څېر متزلزل او بدلېدونکی نه دی.
تر دې وړاندې د طالبانو د قطر دفتر ویاند سهیل شاهین هم ویلي وو، چې دوی سولې ته ژمن دي او پر خپلو خبرو ولاړ دي، خو د امریکا پرله پسې او بدلېدونکو غوښتنو د سولې هوکړې لاسلیک ځنډولی دی. ویل کېږي چې د طالبانو او امریکا تر منځ پر دوو مواردو اختلاف دی. لومړی مورد اوربند یا د تاوترخوالي کمول دي چې طالبان باید ضمانت ورکړي او دویم یې هم د بین الافغاني خبرو د پيل په اړه دی. طالبان وایي، دوی تاوتریخوالی کموي، خو عمومي اوربند به د بین الافغاني خبرو پر مهال رامنځ ته کېږي. افغان حکومت هم د تاوتریخوالي کمول حللاره نه بولي، خو عمومي او اوږدمهاله اوربند مهم بولي.
