د ننګرهار چارواکي وايي، سږ کال په دغه ولایت کې تر دوو میلیونو زیات نوي نیالګي کېنول کېږي.
د ننګرهار د والي ویاند عطاالله خوګیاڼي ویلي چې یاد شمېر نیالګي پخپله په ننګرهار کې د کېنولو لپاره کرل شوي او د یوې کړنلارې له مخې به پر بېلابېلو ادارو ووېشل شي.
د نوموړي په خبره، په دغو نیالګیو کې ۳۰۰ زره مېوه لرونکي او نور بېمېوې دي.
چارواکي ټینګار کوي چې سږ کال د نویو کېنول شویو نیالګیو د پالنې او څارنې چارې هم په جدي توګه سنبالوي.
د ننګرهار چارواکي په داسې حال کې د نویو نیالګیو د کېنولو خبره کوي چې د افغانستان په بېلابېلو سیمو کې د ژمي په پای او د پسرلي په پیلېدو سره د نویو نیالګیو د کېنولو لپاره موسمي فرصت برابرېږي.
د یادونې ده چې تر دې وړاندې هم په نورو ولایتونو کې د نویو نیالګیو د کېنولو لپاره ترتیبات نیول شوي دي.
