الیس ویلز: د نوي حکومت تر جوړېدو دې غني او عبدالله یو بل سره همکاري وکړي

د مرکزي او جنوبي اسیا په چارو کې د امریکا د بهرنیو چارو وزارت مرستیالې الیس ویلز ویلي، د نوي حکومت تر جوړېدو دې د افغان حکومت رهبران یو بل سره اړینه همکاري وکړي. نوموړې د یوې خبرپاڼې په خپرولو سره ویلي، افغانان د تېرو ولسمشریزو ټاکنو وروستیو پایلو ته په تمه دي او دغه راز هیله لري چې د ملي یووالي حکومت رهبران د هېواد امنیت، ثبات او اقتصاد ته پاملرنه وکړي. ویلز دغه راز په یو ټویټ کې د افغان حکومت له لوري د مخدره توکو د قاچاق په تور د څو تنو پولیس چارواکو نیول کېدو ته غبرګون کې ویلي، د مخدره توکو تجارت د افغانستان ثبات، حاکمیت او اقتصادي پراختیا تضعیفوي او په کار ده چې د فاسدو چارواکو پر ضد ورته ګامونه واخیستل شي. د یادونې ده چې د تېرې پنجشنبې په ورځ د کورنیو چارو وزارت وویل چې پولیسو د ځینو چارواکو په ګډون د مخدره توکو د قاچاق یو مهم بانډ نیولی دی.