هند کې افغان محصلین له ګڼو ستونزو سره مخ دي

د هند په پوني ښار کې د بېلا بېلو پوهنتونونو افغان محصلینو د یوه لاریون پر مهال ویلي، چې دوی ته د حکومت لخوا د تېرو دوو میاشتو معاشونه، نه دي ورکړل شوي. یاد محصلین وايي د معاش تر څنګ ورته د اوو میاشتو د کور کرایه هم نه ده ورکړل شوې، چې له امله یې له سختو ستونزو سره مخ دي. افغان محصلین وايي چې دې کار ددوی لپاره لويې ستونزې جوړې کړي او حتا دوی اوس دومره پيسې نه لري چې له کور تر پوهنتون پرې لاړ شي. دوی له افغان حکومت څخه غوښتي چې دې ستونزو ته دې ژر رسیدګي وکړي. د افغان محصلینو د ستونزو په اړه د بهرنیو چارو وزارت مسوولینو ویلي، چې هند کې به د یادو محصلینو ستونزو ته رسیدګي وشي. د بهرنیو چارو وزارت مرستیال ویاند حامد تهذیب ویلي، چې تر دې دمه په هند کې د افغان محصلینو د معاش کموالي په اړه دوی ته کوم شکایت نه دی راغلی، خو دوی دا موضوع څاري.