د ولسمشریزو ټاکنو د وروستیو پایلو د اعلان په درشل کې نوې ناندرۍ او کشمکشونه پيل شوي دي. وړمه ورځ ځينو سیاسي ګوندونو او د ثبات او همپالنې ټاکنیزې ډلې د موازي حکومت د جوړولو خبرداری ورکړ. دوی وویل چې که یې د ټاکنو خپلواک کمېسیون غوښتنې ونه مني او د تقلبي رایو پر بنسټ نوی حکومت رامنځ ته کېږي، نو دوی ته د منلو وړ نه دی. عبدالله عبدالله هم د یادو کسانو دغه دريځ تایید کړی دی او په خبره یې، دی هم د تقلبي رایو پر بنسټ د رامنځ ته شوي حکومت منونکی نه دی.
د ټاکنو خپلواک کمېسیون وایي چې د ټاکنیزو شکایتونو کمېسیون د پرېکړې او لوایحو پر بنسټ یې په ځینو مرکزونو او محلونو کې د رایو ځانګړی تفتیش پيل کړی دی او په پای ته رسېدو دی. دغه کمېسیون وایي چې ډېر ژر به خپله پرېکړه اعلان کړي. بلخوا د ټاکنیزو ټیمونو تر منځ په دې اړه تازه ناندرۍ رامنځ ته شوې دي. څو ورځې وړاندې د ثبات او همپالنې ټاکنیز ټیم د مشرتابه غړي جنرال دوستم وویل چې که د ټاکنو کمېسیون د تقلبي رایو پر بنسټ کوم څوک ګټونکی اعلانوي، نو دوی ته به د منلو وړ نه وي. ده خبرداری ورکړی و چې موازي حکومت به اعلانوي. له دې سره جوخت د یاد ټاکنیز ټیم بل غړي کریم خلیلي هم د جنرال دوستم د خبرو ملاتړ کړی او وایي، د موازي حکومت اعلانولو ته تیار دي.
په دې پسې د جمعیت ګوند هم د یوې خبرپاڼې په خپرولو سره وویل چې دوی د عبدالله عبدالله په مشرۍ د ثبات او همپالنې حکومت اعلانوي، نو ښه به وي چې ټاکنیز کمېسیونونه خپلې چارې په پوره شفافیت مخ ته یوسي. د جمعیت اسلامي ګوند د ټاکنو خپلواک کمېسیون له یوه ځانګړي نوماند په ملاتړ تورن کړی او وايي، دغه کمېسیون خپله خپلواکي نه ده ساتلې.
د ملي یووالي حکومت اجرایه رییس عبدالله عبدالله بیا تېره ورځ د وزیرانو شورا په غونډه کې د یادو کسانو پر دریځ ټینګار وکړ. د ده په خبره، د ثبات او همپالنې ټاکنیزې ډلې مشرتابه چې کومه پرېکړه کړې ده، دی یې هم مني او ملاتړ یې کوي. د عبدالله په خبره، ده ته هم د تقلبي رایو پر بنسټ رامنځ ته شوی حکومت د منلو وړ نه دی، نو پر وړاندې به یې غبرګون وښيي. عبدالله ویلي: «د ثبات او همپالنې ټیم خپل دریځ اعلان کړی دی. دا دریځ ډېر واضح دی، یوازې مشروع او شفافې پایلې موږ ته د منلو دي. هېڅ هغه پایلې نه منو چې په هغه کې مشروعیت او شفافیت نه وي، د ټیم مشرانو هم خپل دریځ اعلان کړی دی او زما موقف هم همدا دی.»
نوموړي د سولې په برخه کې پر وروستیو پرمختګونو هم خبرې کړې دي. هغه ویلي چې د افغانستان ټول خلک د تاوتریخوالي له کمېدو او دغه راز د سولې په برخه کې د رامنځ ته شوو پرمختګونو هرکلی کوي او هر افغان هیله لري چې دلته روانه جګړه له سوله ییزو لارو حل شي. هغه زیاته کړې: «د افغانستان ټول خلک د دې پرمختګونو هرکلی کوي. مخکې مو هم موقف همدا و، هر ګام چې د جګړې پای ته رسېدو لپاره پورته کېږي، هر ګام چې موږ سولې ته نږدې کوي، یو مثبت ګام دی موږ یې هرکلی کوو.»
اجرایه رییس همدا راز په هوایي بریدونو کې د ملکي وګړو پر تلفاتو او مرګ ژوبله هم اندېښنه ښودلې ده او پر امنیتي مسوولینو یې غږ کړی چې د ملکي وګړو ژوند ته جدي پاملرنه وکړي. هغه ویلي چې د ملکي وګړو د خوندیتوب لپاره باید جدي ګامونه اوچت شي او په دې برخه کې بې پروايي چا ته د منلو نه ده.
د ټاکنو په اړه ناندرۍ داسې مهال دي چې د ټاکنو خپلواک کمېسیون بیا په نږدې ورځو کې د پایلو د اعلان خبره کوي. د ټاکنو خپلواک کمېسیون وایي چې د ځانګړي تفتیش پروسه ختمه شوې ده او په دریو یا څلورو ورځو کې به د ولسمشریزو ټاکنو پایلې هم اعلان کړي.
