شاهین: قطر ته مو د افغان پلاوي د راتلو غوښتنه نه ده کړې

د امریکا او طالبانو تر منځ د تړون تر لاسلیکېدو مخکې افغان حکومت دوحې ته د یوه پلاوي د استولو خبر ورکړ چې په خبره یې د طالبانو د مکررو غوښتنو په پایله کې به له دې ډلې سره د بین الافغاني مذاکراتو په اړه لومړني بحثونه وکړي. د ولسمشر ویاند صدیق صدیقي ویلي، افغان حکومت د طالبانو د مکررو غوښتنو پر بنسټ چې د نړیوالو همکارانو له طریقه شوې وې د مقدماتي اړیکې ډله جوړه کړه ترڅو له دې ډلې سره اړیکه ونیسي. خو په قطر کې د طالبانو د سیاسي دفتر ویاند سهیل شاهین ویلي، چې له افغان حکومت څخه یې داسې کومه غوښتنه نه ده کړې او له پلاوي سره به ونه ګوري. نوموړي ویلي چې طالبان د سولې په بهیر کې د مخکې توافق شوي چوکاټ له مخې اقدامات کوي. شاهین ویلي چې د امریکا او طالبانو تر منځ هوکړه لاسلیکیږي، تر هغه وروسته بیا د اعتماد سازۍ مرحله ده چې پکې د دواړو لورو بندیان ازادیږي.