میر رحمان رحماني خپل روغتون د کرونا ناروغانو درملنې ته وقف کړ

د ولسي جرګې رییس خپل یو روغتون په کابل ښار کې د کرونا د ناروغانو درملنې ته وقف کړ. د کابل ښاروالۍ د معلوماتو له مخې دغه روغتون نن د کابل ښاروال، د ولسي جرګې د رییس میر رحمان رحماني او عامې روغتیا وزیر فیروز الدین فیروز له لوري پرانیستل شو. دغه شپېته بستریز روغتون به په کابل ښار کې د کرونا د ناروغانو لپاره کارول کېږي او ټول امکانات یې د عامې روغتیا وزارت په واک کې ورکړل شوي دي. د عامې روغتیا وزیر فیروزالدین فیروز هم په دې اړه په جوړو شوو مراسمو کې د خبرو پر مهال وویل، چې افغانان په دې وخت کې د یو بل لاسنیوي ته اړتیا لري او دغه ډول اقدامات د قدر وړ دي. میر رحمان رحماني هم وویل چې افغانان په سختو شرایطو کې دي باید د یو بل لاس ونیسي او په خبره یې دی تر خپلې وسې په دې بحراني وضعیت کې نورو مرستو ته هم تیار دی.