سي ان ان : له افغانستان د امریکایي ځواکونو د سرتیرو ایستل کیدو لړۍ چټکه شوې

امریکايي رسنۍ وايي، د ټرمپ ادارې له طالبانو سره د لاسلیک کړې هوکړې پر اساس تر ټاکل شوي مهالوېش مخکې په افغانستان کې د امریکايي پوځیانو شمېر تر ۱۰ زرو کم کړی دی. سي ان ان ټلویزیون ویلي، دا خبره درېو سرچینو، چې په افغانستان کې د امریکايي پوځیانو د شمېر په اړه یې معلومات لرل، ورته کړې ده. په دوحه کې د فبرورۍ په ۲۹ نېټه د امریکا او طالبانو تر منځ د هوکړې پر اساس امریکا باید په افغانستان کې د خپلو ۱۳ زره پوځیانو شمېر د جولای تر نیمايي پورې ۸۶۰۰ ته راکم کړي خو اوس داسې ښکاري چې امریکا به تر ټاکلې نېټې ډېر مخکې د خپلو پوځیانو شمېر ۸۶۰۰ ته راټیټ کړي. سرچینې ویلي چې تر ټاکلې مودې ممکن څو میاشتې وړاندې د امریکايي پوځیانو شمېر ۸۶۰۰ ته ټيټ شي. د را پور له مخې، د امریکا یوه پوځي چارواکي ویلي، د کرونا وبا د امریکايي ځواکونو د ایستلو بهیر چټک کړی دی. همدارنګه ددغه وبا د خپرېدو له کبله امریکايي پوځیانو د افغان ځواکونو د روزنې بهیر د پام وړ کم کړی دی.