د افغان جاپان روغتون مسوولین: د کمزوري مدیریت له امله لسګونه قلمه توکي غلا شوي دي

په افغان-جاپان روغتون کې یو شمېر مسوولین وایي ددې روغتون لسګونه قلمه تجهیزات غلا شوي او یا چېرته پټ کړل شوي چې په تدریجي توګه له دې روغتون و ایستل شي. د افغان جاپان روغتون اوسني رییس احمد ظاهر سلطاني ویلي دغه توکي د پخوانیو مدیرانو د کمزوري مدیریت او له واک د ناوړه ګټه اخیستنې پر مهال غلا شوي دي. سلطاني وایي که افغان-جاپان روغتون له دغه تجهیزاتو او دارو درملو په سمه توګه استفاده کړې وای هېڅ وخت به د توکو له کمښت سره مخ شوې نه وه او نه به هم د خلکو شکایتونه دومره اوج ته رسېدل. دده په خبره په دې توکو کې درمل، اغوستن توکي، ویټلانټورونه او نور تجهیزات شامل دي. هغه وايي چې ځینو کارکوونکو ددغه فساد د موجودیت له امله د استعفا غوښتنه کړې ده خو استعفا یې نه ده منل شوې. هغه وايي چې د خپلو موندنو راپور یې د عامې روغتیا له وزارت سره شریک کړی دی او په اړه یې د اقدام غوښتنه کړې ده.