سږ کال له کندهاره د ۴ میلیونو امریکایي ډالرو په ارزښت انار صادر شوي

 په کندهار کې سږ کال پر وچکالۍ سربېره د انارو حاصلات ډېر وو او تر دې مهاله ۱۸ زره ټنه بهر ته صادر شوي چې ټوليز ارزښت يې شاوخوا درې سوه ميليونه افغانۍ کېږي. د کندهار د سوداګرۍ خونې مرستیال عبدالباقي بینا وايي، که څه هم سږ کال کندهار  وچکالۍ ځپلی او اوبه کمې وې، خو د انارو حاصلات ډېر ښه دي. دی وایي، تر دې مهاله له کندهار څخه د شاوخوا ۴ میلیونه امريکايي ډالرو په ارزښت ۱۸ زره ټنه انار بهر ته صادر شوي او دا لړۍ روانه ده. د ده په خبره، د دغو انارو ډېره برخه پاکستان او لږه برخه یې هند او متحده عربي اماراتو ته صادر شوي دي. دی وايي، د هغو انارو کچه تر دې هم ډېره ده چې له دوی سره راجستر شوي نه دي او د هېواد بېلابېلو ولایتونو ته لېږدول شوي دي.