طالبان : نړیواله ټولنه دې خپلې مرستې له مونږ سره همغږې کړي

په داسې حال کې چې نیږدې راتلونکې کې،افغانستان لپاره د مرستو جلبولو په نیت جینوا کنفرانس جوړیږي،وسله وال طالبان وایي نړیواله ټولنه دې له افغانستان سره ددوی په همغږۍ مالي مرستې وکړي. د وسله والو طالبانو له لوري په خپره شوې اعلامیه کې راغلي دي چې د ولس هوساینه ددوی موخه ده او افغانان اوس په دې حساسو شرایطو کې د نړیوالو مرستو ته اړتیا لري. ددوی په خبره په تېره کې ثابته شوې چې د نړیوالو مرستې په کابل کې د څو ځانګړو کسانو جیبونو ته ځي او ولس ترې محروم دی نو له همدې امله نړیوالې ټولنې ته په کار ده چې له دوی سره په همغږۍ خپلې مالي مرستې وکړي. طالبانو ویلي نړیوالو ته د مرستو او اقتصادي همکاریو زمینه برابروي او دوی ژمن دي چې دغه مرستې په اړینو مواردو کې په پوره شفافیت ولګول شي. طالبان داسې مهال دغه څرګندونې کوي چې تر دې وړاندې اروپايي ټولنې ویلي وو، چې د سولې خبرو کې پایلې ته د نه رسېدو له امله طالبانو په جینوا کنفرانس کې د ګډون چانس له لاسه ورکړی دی.