اوچا: افغانستان کې د پوهنې د ملاتړ لپاره ۲۱۵ میلیونه ډالرو ته اړتیا ده

په افغانستان کې د ملګرو ملتونو د بشري مرستو د همغږۍ دفتر یا اوچا روان میلادي کال کې د تعلیم د ملاتړ لپاره د ۲۱۵ مېلیونه ډالرو بیړنۍ مرستې غوښتنه کړې.  دغه بنسټ ویلي، په افغانستان کې ۸.۷ مېلیونه وګړي د زده کړو په برخه کې ملاتړ ته اړ دي چې دوی ترې ۳.۱ مېلیونه ته په روان ۲۰۲۳ کال کې لومړيتوب ورکړی.  اوچا دا پیسې په ټولنو کې نجونو ته د زده کړو، ښوونځیو ته د تجهیزاتو پېرلو، ښوونکو ته د روزنې او له لرې د زده کړو د خدماتو برابرولو ته غوښتې دي. افغانستان کې له شپږم پورته د نجونو پر ښوونځیو د بندیز نن ۵۳۲ ورځې پوره شوې. په لوړو زده کړو کې يې د نجونو په لګولي بندیز هم شاوخوا دوې میاشتې اوړي.  ملګري ملتونه وایي، که نوي ښوونیز کال کې ښوونځیو ته اجازه ورنه کړل شي، څه باندې ۲۱۵ زره نورې هغه نجونې چې تازه اوومو ټولګیو ته بریالۍ شوي، هم له زدکړو بې برخې شي.