امنیت شورا: افغان ځواکونه دې د خلکو د ژغورنې کمپاین پیل کړي

امنیت شورا پر امنیتي ځواکونو د خلکو د ژغورلو امر کړی دی. د ملي امنیت شورا له لوري په خپره شوې خبرپاڼه کې راغلي چې په ګڼو ولایتونو کې درانه سیلابونه راوتلي دي او خلک بېړنیو مرستو ته اړتیا لري. امنیت شورا پر امنیتي ځواکونو غږ کړی، چې دوی دې په ټول هېواد کې په سیلابونو کې د بند پاتې کسانو د ژغورنې کمپاین پیل کړي. په خبرپاڼه کې راغلي چې امنیتي ادارې او افغان ځواکونه دې په کلیو او بانډو کې له خلکو سره اړیکې ونیسي او د اړتیا پر مهال دې ځانونه سیمو ته ورسوي. دوی له افغان هوايي ځواکونو غوښتي چې تر بل هر وخت دې د خلکو مرستو ته تیار وي او اړمن کسان دې په دې سختو شرایطو کې وژغوري. امنیت شورا همدا راز ویلي چې له خلکو سره دې د خوراکي، سونتوکو او نورو اړینو موادو مرستې وشي.