برادر: هغوی چې کورنیو جګړو ته لمن وهلې تل تور مخي شوي

د ریاست‌الوزرا اقتصادي مرستیال د زمري ۲۸مې د خپلواکۍ د بېرته اخیستلو د ۱۰۷مې کلیزې په نمانځغونډه کې وویل، چې ۱۰۷ کاله وړاندې افغانانو د لږو امکاناتو سربېره د سرښندنو له لارې د انګرېزانو پر وړاندې مبارزه وکړه او خپله خپلواکي یې ترلاسه کړه. نوموړي ټینګار وکړ، چې افغانان باید د تنګ‌نظرۍ ښکار نه شي، خپل یووالی وساتي او د خپلې ازادۍ او خپلواکۍ د ساتنې لپاره هڅې وکړي. هغه زیاته کړه، چې د خپلواکۍ له برکته اسلامي ارزښتونه خوندي پاتې شوي دي. برادر وویل، هغوی، چې کورنیو جګړو ته لمن وهلې، تل تور مخي شوي دي. نوموړي له هېوادوالو وغوښتل، چې د هېواد د ابادۍ لپاره ګډې هڅې وکړي او افغانستان د بهرنیو له اغېزو څخه خوندي وساتي. نوموړي په خپلو خبرو کې له هغو کسانو چې د ده په وینا، تخریبي فعالیتونه کوي، غوښتي چې د اسلامي نظام او ولس ترڅنګ ودرېږي، د کړاو ځپلو افغانانو لپاره ستونزې جوړې نه کړي، د بهرنیانو په لاس له تخریب څخه لاس واخلي او کورنیو جګړو ته لمن ونه وهي.