د بشري حقونو کمیسیون: تېر کال ملکي مرګ ژوبله ۱۹ سلنه لوړه شوې

د بشري حقونو خپلواک کمیسیون وایي، تېر کال په ملکي تلفاتو کې ۱۹ سلنه ډېروالی راغلی دی. د یاد کمیسیون د راپور له مخې، وړم کال په ټول هېواد کې ۹۴۱۰ کسانو ته مرګ ژوبله اوښتې وه خو تېر ۱۳۹۷ لمریز کال کې بیا د تاوتریخوالي په پېښو کې یولس زره پنځه سوه او دوه دېرش کسانو ته مرګ ژوبله اوښتې ده چې د وړم کال په پرتله ۱۹ سلنه ډېروالی ښیي. د یاد کمیسیون په کلني راپور کې راغلي چې ملکي وګړو ته یاده مرګ ژوبله ۵۳ سلنه د طالبانو، ۱۲.۵ سلنه د داعش، ۱۱.۵ سلنه د افغان سرتېرو او بهرنیانو لخوا اوښتې ده. یاد کمیسیون له ښکېلو غاړو غوښتنه کړې چې د جګړو پر مهال د ملکیانو ژوند ته جدي پاملرنه وکړي. تر اوسه افغان حکومت، نړیوالو ځواکونو او طالبانو په دې اړه څه نه دي ویلي.