یونسیف: د افغان ماشومانو د ژغورنې لپاره مالي مرستو ته اړتیا لرو

د ملگرو ملتونو د ماشومانو د ملاتړ صندوق یا یونسیف له خوارځواکۍ سره د مخ ماشومانو د درملنې لپاره مالي مرستې غوښتې دي. د یونسیف د یوه راپور له مخې شاوخوا دوه میلیونه افغان ماشومان په خوارځواکۍ اخته دي چې له دې ډلې ۶۰۰ زره یې په خورا ترینګلي وضعیت کې دي. د ملگرو ملتونو د ماشومانو د ملاتړ صندوق یا یونسیف ویاند کریستف بویلیراک، وایي چې افغان ماشومان غیر صحي غذایي رژیم لري او ددغو ماشومانو ژوند له خطر سره مخ دی. افغانستان د یمن او جنوبي سوډان تر څنگ د هغو هیوادونو له ډلې دی چې تر پنځو کلونو کم عمره ماشومان تر نورو ډېر پر خوارځواکۍ اخته کېږي. د تېر ۲۰۱۸ کال وچکالۍ په هېواد کې د ماشومانو وضعیت نور هم خراب کړی او خوارځواکي یې زیاته کړې ده. یونسیف په پام کې لري چې سږکال په خوارځواکۍ باندې د ٦٠ فیصده اخته ماشومانو له ډلې شاوخوا ۳۷۵ زره ماشومانو ته اړینې مرستې برابروي.