په افغانستان او پاکستان کې؛ د پاکستاني حکومت پر ضد لاریونونه شوي

تېره شپه سلګونو کسانو په کابل کې د پاکستان پر ضد لاریون کړی دی او پر پښتنو یې د یاد هېواد روان ظلمونه غندلي دي. په کابل کې د لوی افغانستان تحریک مشر جمیل یاد لاریون ته په خبرو کې وویل، پاکستان هغه هېواد دی چې له پیله تر اوسه یې پر افغانانو په تېره بیا محکومه خاوره باندې هر ډول تشدد او ظلمونه کړي دي چې نور باید د کرښې دواړو غاړو ته مېشت افغانان د دې هېواد د غلطو پالیسو پر ضد خپل غږ پورته کړي. هغه وویل دا هدف عمل ته اړتیا لري او نور افغانانو ته په کار ده چې د عمل ډګر ته را ودانګي او د هر نوع ظلم پر وړاندې ودرېږي. نوموړي د پښتون ژغورنې غورځنګ پر سوله ییز تحریک باندې د پاکستان لخوا د ترهګرۍ تورونه هم غندلي دي. بلخوا په زرګونو کسانو په پاکستان کې هم تر روژه ماتې وروسته د پاکستاني ریاست پر ضد لاریون کړی دی. هغوی هم د سوله ییز غورځنګ پي ټي ایم پر جلسه د پاکستاني پوځیانو برید غندلی او غوښتنه یې کړې چې حکومت باید له ورته عملونو لاس واخلي ګنې په زیان به یې تمام شي.