د افغان سولې په اړه د هلو ځلو په لړ کې دا دویم ځل دی چې په مسکو کې د افغان سولې په اړه غونډه جوړېږي. پرون د افغانستان او روسیې د ډيپلوماټیکو اړیکو سلمه کلیزه ونمانځل شوه. په همدې مناسبت په مسکو کې یو غونډه جوړه شوې وه، چې لومړی پکې د افغانستان- روسیې پر سل کلونو ډيپلوماټیکو اړیکو خبرې وشوې او بیا پر افغان سوله بحثونه وشول.
په دې غونډه کې د افغان سیاسیونو او حکومتي چارواکو یوه پلاوي د پخواني ولسمشر حامد کرزي په مشرۍ ګډون کړی و. د وسله والو طالبانو د یوه څوارلس کسیز پلاوي مشري بیا د قطر دفتر مشر او د طالبانو د تحریک سیاسي مرستیال ملا برادر کوله.
په دې غونډه کې تر ډېره د بهرنیو ځواکونو پر وتلو او په افغانستان کې د روانې جګړې پر ختمولو خبرې وشولې. وسله والو طالبانو ټینګار کاوه، چې دوی سولې ته ژمن دي، خو د دوی په خبره، لومړی باید د افغانستان (اشغال) پای ته ورسېږي. د طالبانو د قطر دفتر مشر ملا برادر افغانستان د امریکایي او نورو بهرنیو ځواکونو له لوري اشغال شوی وباله او په وینا یې لومړی دې بهرني ځواکونه له افغانستانه ووځي، نو وروسته به دوی د سولې خبرو ته ادامه ورکوي. ملا برادر دغه راز په خپلو خبرو کې پر دې هم ټینګار وکړ، چې لومړی باید د سولې په لار کې شته خنډونه له منځه یوړل شي.
په دغه غونډه کې پخواني ولسمشر حامد کرزي، د سولې عالي شورا رییس کریم خلیلي، د جمعیت ګوند اجرایي رییس عطامحمد نور، د ولسمشریزو ټاکنو نوماند حنیف اتمر او په مسکو کې افغان سفیر لطیف بهاند ویناوې وکړې. دوی د افغانستان او روسیې د اړیکو پر ارزښت خبرې وکړې او هغه یې خورا مهمې وبللې.
پخواني ولسمشر حامد کرزي هم په دغه کنفرانس کې د خبرو پر مهال وویل، چې افغان جګړه یوازې د سیاسي مذاکراتو له لارې د حل وړ ده او جګړې د هېچا په ګټه نه دي. د ښاغلي کرزي په خبره، که د سولې هڅې یوې پایلې ته ورسېږي، نو له افغانستانه به د سیمې په ګډون د نړۍ هېڅ هېواد ته هم خطر متوجه نه شي. هغه د سولې په برخه کې د روسیې له رول څخه هم مننه کړې ده او هیله یې څرګنده کړې چې مثبتې پایلې به ولري.
بل پلو د روسیې د بهرنیو چارو وزیر سرګي لاوروف بیا ویلي چې ټول بهرني ځواکونه باید له افغانستانه ووځي. د نوموړي په خبره، د دې اړتیا ده چې په افغانستان کې روانه جګړه ختمه کړل شي او د دې جګړې د ختمولو لپاره باید بینالافغاني مذاکرات پیل شي او بهرني ځواکونه دې له افغانستانه ووځي. هغه همدا راز وویل چې د افغانستان د دایمي ثبات او سولې لپاره باید ټول افغاني اړخونه ژر تر ژره په خپلو کې سره کېني او په خپلو کې دې سوله وکړي. لاوروف ویلي، باوري دی چې د افغانستان جګړه یوازې او یوازې د مذاکراتو پر مټ د حل وړ ده او هېڅ راز نظامي حللاره دغه جګړه پای ته نه شي رسولی.
بل پلو د وسله والو طالبانو استازي مولوي امیر متقي بیا وویل، چې دوی د سولې غوښتونکي دي او له ټولو ګاونډیو هېوادونو سره به ښې اړیکې پالي. د نوموړي په خبره، له افغانستانه هېچا ته زیان نه رسوي او له ټولو سره به د ښو اړیکو په جوړولو کې هڅه کوي.
افغان حکومت بیا وایي چې د روسیې او مسکو د ډيپلوماټیکو اړیکو په سلمه کلیزه کې یې د بهرنیو چارو وزارت په استازيتوب افغان سفیر لطیف بهاند او د سولې عالي شورا په استازیتوب کریم خلیلي ګډون کړی دی. دغه سفر او غونډه په ټولنیزو رسنیو کې هم له بېلابېلو غبرګونونو سره مخ شوې ده.
