د ماشومانو لپاره د ملګرو ملتونو د ملاتړ نړیوالې ادارې یا «یونیسف» ويلي، په افغانستان کې په تېرو دوو کلونو کې پر ښوونځو بریدونه دری برابره ډېر شوي دي.
یونیسف ويلي، د دوی د راپور له مخې په تېر ۲۰۱۸ او ۲۰۱۷ ز کلونو کې په افغانستان کې پر ښوونځیو ۱۹۲ بریدونه شوي، په داسې حال چې په ۲۰۱۵ او ۲۰۱۶ ز کلونو کې دغه شمېره ۶۸ وه.
د یونیسف اجرایوي مدیرې هنریتا فور رویټرز خبري اژانس ته ویلي: «په افغانستان کې د زده کړو بهیر له جګړو او تاوتریخوالي سره مخ دی. پر ښوونځیو بې مانا بریدونه، د ښوونکو وژل، وهل او اختطاف کول او د ښوونې او روزنې پر وړاندې نور ګواښونه هغه څه دي، چې د زده کړو په اړه یې د افغان ماشومانو پوره نسل له ناهیلۍ سره مخ کړی دی».
یادې ادارې همدارنګه ویلي چې په تېر ۲۰۱۸ ز کال کې په ټول افغانستان کې د جګړو او ناامنیو له امله، زر ښوونځي تړل شوي چې له امله یې شاوخوا ۵۰۰ زره ماشومان له زده کړو بې برخې پاتې دي.
بلخوا پوهنې وزارت هم مني چې تېر کال په افغانستان کې پر ښوونځیو زیات بریدونه شوي دي.
دغه وزارت په ۲۰۱۸ ز کال پر ښوونځیو د بریدونو د زیاتېدو یو لامل د ولسي جرګې د ټاکنو پر مهال له ښوونځیو څخه د رایو ورکوونکو د مرکزونو په توګه استفاده یادوي.
د دغه وزارت ویاندې نوریې نضهت امریکا غږ ته ویلي، چې تر دې مهاله ۴۰۰ ښوونځي د ناامنیو له امله د زده کوونکو پر مخ تړل شوي دي.
نوموړې زیاته کړې: «پر ښوونځیو د بریدونو د زیاتوالي یو لامل پارلماني ټاکنې وې، چې په دې ټاکنو کې له ښوونځیو څخه د رایې ورکوونکو د مرکزونو په هدف استفاده کېده».
نضهت زیاته کړې چې د پوهنې وزارت هڅه کړې، چې د ورته پېښو د مخنیوي لپاره ښوونځي له سیاسي فعالیت څخه لرې پاتې شي.
د پوهنې وزارت د معلوماتو له مخې، په افغانستان کې د ۴۰۰ ښوونځیو د بندېدو له امله سل زره زده کوونکي له زده کړو څخه محروم شوي دي.
د معلوماتو له مخې، دا مهال په ټول هېواد کې ۳.۷ میلیونه افغان ماشومان د جګړو او ناامنیو، فقر او ځینو نورو لاملونو له امله له زده کړو څخه بې برخې دي.
