روان کال؛ تر دې دمه څه باندې ۳۰۰ زره افغانان بېځایه شوي دي

د کډوالو او راستنېدونکو چارو وزیر وايي، په ٢٠١٩ کال کې د بې ځایه شویو شمېر٣١٨٥٩١ تنو ته رسېږي، چې ٥٧٠٥٧ تنه یې بېرته خپلو اصلي مېنو ته ستانه شوي دي. د کډوالو او بېرته راستنېدونکو چارو اجرايیوي کمېټې خپله ناسته کړې ده. په دې ناسته کې د کډوالو او راستنېدونکو چارو وزیر سید حسین عالمي بلخي د تېرې غونډې په اړه معلومات وړاندې کړل او ويي ویل، په ٢٠١٩ کال کې د بې ځایه شویو شمېر ٣١٨٥٩١ تنو ته رسېږي، چې له دې څخه يواځې ٥٧٠٥٧ تنه یې بېرته خپلو اصلي مېنو ته ستانه شوي دي. ده زیاته کړه، د جګړو له امله له ننګرهار، فاریاب، هلمند، فراه، تخار، کندوز او بلخ ولایتونو څخه په ٢٠١٩ کال کې ٣٦٣٠٩ تنه له خپلو اصلي مېنو بې ځایه شوي، چې په دومره موده کې ٦٩٦٨ کورنۍ بېرته خپلو مېنو ته ور ګرځېدلې دي. د هغه په وينا، له دې جملې څخه ٩٢٥٧ کورنيو سره نړیوالو ټولنو مرستې کړې دي. بلخي وايي، په هرات او بادغیس ولایتونو کې بې ځایه شویو کورنیو ته د رسېدنې او ورسره د مرستو لپاره ١٤٠ میلیونه افغانۍ وړاندیز شوي، څو د هغوی ستونزې راکمې کړي او بېرته خپلو اصلي مېنو ته وګرځي.