مسکو کې بين الافغاني ناستې؛ د اعلاميې په خپريدو سره د خبرو پر دوام ټينګار وکړ

د روسیې په پلازمېنه مسکو کې د افغان سیاستوالو او طالبانو درې ورځنۍ ناسته نن د یوې اعلامیې په خپرولو سره پای ته رسېدلی ده. په اعلامیه کې راغلي، په دې لیدنه کې دواړو لوریو پر بین الافغاني خبرو، اوربند، په جګړه کې د ملکي وګړو پر خوندیتوب، زندانیانو، له افغانستان د بهرنیو ځواکونو پر وتلو او د افغانستان په کورینو چارو کې د بهرنیانو پر نه لاسوهنې خبرې کړې دي. که څه هم طالبان د دې ناستې پایلې مثبتې بولي خو د دې ناستې یو تن ګډونوال عطا محمد نور وایي، پوره نهه ساعته یې له طالبانو سره د اوربند په اړه خبرې کړې دي خو کومه پایله یې نه ده ورکړې. هغه ویلي پایله یې ځکه ورنه کړه چې طالبانو د اوربند د رد لپاره قانع کوونکي دلایل نه لرل.