د سولې ولسي حرکت غړي د یوه ماشوم په ملتیا هلمند ته روان شول

د هلمند د سولې ولسي حرکت غړي په يوه نوي پلي سفر د طالبانو تر واک لاندې سيمې موسی کلا ته روان شول. د دغه حرکت مشر اقبال خيبر ویلي، چې دوی له دې مخکې د حکومت، بهرنيو ځواکونو او بېلابېلو سفارتونو له استازو سره ليدنې کړې دي او مثبتې اغېزې يې درلودلې دي. ده زياته کړې، دغه ځل يې د يوه اته کلن ماشوم او يوه سپي تر څنګ ۳۰ غړي پلي موسی کلا ولسوالۍ ته روان شول چې هلته به د طالبانو د مسوولينو ترڅنګ له مېشتو ولسي خلکو سره وګوري، څو د سولې له روان بهير او د دوی له هڅو حمایت وکړي. د هغه په وينا چې د يوه نوي پيل شوي فعاليت په ترڅ کې به د طالبانو تر واک لاندې سيمې موسی کلا ته پلي ولاړ شي، څو د سولې او اوربند غږ تر عامو خلکو او د طالبانو تر مسوولینو ورسوي او هیله لري چې دوی زموږ خبرو ته غوږ ونیسي. د دغه حرکت بل غړي باچاخان مولاداد ویلي، هیله لري د طالبانو تر واک لاندې سیمو کې به د سولې او اوربند په برخو کې د سیمې خلک ډېره همکاري وکړي.