خوست ته ۱۶۰۰ وزیرستاني کورنۍ را کډه شوي دي

د خوست ځايي چارواکي وايي چې په دې وروستيو کې له شمالي وزیرستانه شاوخوا ۱۶۰۰ کورنۍ د جگړو له کبله را کډه شوي دي. دغه کورنۍ د خوست د کډوالو ګلانو په کمپ او ځينو ولسوالیو کې ځای پرځای شوي دي. راکډه شوي کډوال وایي چې په وزیرستان کې د جګړو او د پاکستاني پوځ د عملیاتو له امله اړ شول چې خپل کورونه پریږدي. د وزيرستان له ادم کوټ سیمي څخه رامهاجر شوی ملاداد خان وايي، چې په خپله سیمه وزیرستان کې یې ژوند خوندي نه و، ډيرو خلکو د جګړې او د توپ مرمیو د لګیدو له امله ژوند له لاسه ورکړ او دوی اړ شول، چې له ډیورنډ کرښې راواوړي. د خوست د کډوالو چارو رییس محمدهاشم حلیم ویلي، چې له تېرې یوې میاشتي راهیسې له شمالي وزیرستانه د جګړو له امله د کډو بهیر پیل شوی دی او تر اوسه څه باندي۱۶۰۰ وزیرستانۍ کورنۍ له دوی سره راجستر شوې دي. نوموړی وایي، دوی له دغو کډوالو سره د خېمو او لومړنیو خوراکي توکو مرستې پیل کړي دي او د نورو کډوالو د راتګ له پاره هم د مرستو چمتوالی لري.