زلمی خلیلزاد: د سولې خبرې باید چټکې او افغان وژنه ودرول شي

زلمی خلیلزاد وایي په افغانستان کې باید د تاوتریخوالي کچه راټټه شي او افغان وژنه ودرول شي. نوموړي په خپلو تازه ټوېټونو کې ویلي چې د افغان سولې په اړه یې خپل نوی سفر پيل کړی دی. دده په خبره په دې سفر کې به لومړی د افغان سولې په اړه سیمه ییزه او نړیواله اجماع پیاوړې کوي، دداخلي اجماع پر پیاوړتیا به تمرکز کوي او هڅه به کوي چې له طالبانو سره تر دې دمه په خبرو کې دوه مهم موارد چې بحثونه ورباندې شوي نهایي کړي. هغه همدا راز ویلي چې د سولې خبرې به چټکې کړي او هدف یې دا دی چې په افغانستان کې تاوتریخوالی راکم شي او افغان وژنه ودرول شي. هغه د طالبانو د مشر د وروستي پیغام په اړه ویلي، د طالبانو پیغام ښيي چې دوی بین الافغاني خبرو ته لېوالتیا ښودلې خو داسې خبرې هم پکې شته چې د سولې پروسې ته زیان رسولی شي. د خلیلزاد په خبره امریکا د جګړې د دوام او تاوتریخوالي غوښتونکې نه ده او په دې لټه کې ده، چې ژر تر ژره افغان جګړه پای ته ورسېږي او د سولې خبرې مثبتې پایلې ولري. د زلمي خلیلزاد دا اووم سفر دی او دوه اونۍ به دوام وکړي.