حقوقپوهان: پر عدلي او قضايي ارګانونو؛ د عبدالله نیوکې د ستر فساد او بې باورۍ اوج دی

پر عدلي او قضايي ادارو د ډاکټر عبدالله عبدالله نیوکې په دغه بنسټونو کې د ستر فساد او بې باورۍ په مانا دي. د ملي یووالي د حکومت اجرایه رییس ډاکټر عبدالله عبدالله پرون په یوه غونډه کې وویل، چې ولسمشر د خپل یوه سلاکار نجیب الله احمدزي قضیه لویې څارنوالۍ ته سپارلې او په وینا یې د رشوت خورو منګولو ته د قضیې سپارل د حل لار نه ده. دده په وینا په عدلي او قضايي ادارو کې پراخ فساد موجود دی او لا هم پر دغه بنسټونو ددې باور نشته دی، چې دوی دې عدالت تامین کړی شي. بل پلو د حقوقي مسایلو شنونکي او حقوق پوهان بیا وايي د ډاکټر عبدالله عبدالله دغه ډول څرګندونې د جدي اندېښنې وړ دي. د افغانستان د حقوقپوهانو د ټولنې یوه غړي سبحان الله مصباح له سپوږمۍ راډیو سره په خبرو کې وویل، چې د حکومت د یوه لوړپوړي چارواکي دغه ډول تېزې او توندې څرګندونې ددې ښکارندویي کوي چې په عدلي او قضايي ادارو کې پراخ فساد موجود دی. دده په وینا ډاکټر عبدالله عبدالله او عدلي او قضايي ادارې باید په دې اړه ملت ته سپیناوی ورکړي. د مصباح په خبره په دې کې هېڅ شک نشته، چې په عدلي او قضايي ادارو کې پراخ فساد موجود دی، خو د عبدالله عبدالله خبرې په دې مانا دي چې فساد اوج ته رسېدلی او دا د ټول ملت لپاره سترې اندېښنې زېږوي. نوموړي دغه راز وویل، چې د ډېری عدلي او قضايي ادارو پرېکړې سیاسي دي او حکومت یې په چارو کې پراخ نفوذ لري. هغه زیاته کړې د عبدالله عبدالله خبرې باید په جدي توګه وڅېړل شي او دغه مهمې ادارې دې د فساد له شره خلاصې کړل شي.