د کوچني اختر په مناسبت ۸۸۷ بندیان له بنده ازادیږي

ولسمشر غني د څرخي پله زندان له بندیانو سره کتلي، په دې کتنه کې د یاد زندان زندانیانو له ولسمشر سره خپلې غوښتنې او وړاندیزونه شریک کړل. دوی د زیات عمر لرونکو، او هغو سیاسي بندیانو چې دوسیې یې بشپړې شوي د خوشې کېدو، د بندیانو د درملنې په خاطر د ډاکټرانو د استخدام، د بګرام زندان د محبوسینو قضیو ته د رسېدنې، په ابدي زندان د اعدام د حکم د بدلولو، د محبوسینو لپاره د درسي توکو د نشتوالي او د محبوسینو د ځای د تنګوالي په برخو کې خپلې ستونزې او غوښتنې بیان کړې دي. ولسمشر غني د زندانیانو د ستونزو د حل په اړه وویل، چې په دې برخه کې به ژر تر ژره لازم اقدامات وشي. د یادونې وړ ده چې د نېکمرغه کوچني اختر په مناسبت به د هېواد له بېلابېلو زندانونو څخه ۸۸۷ بندیان خلاص شي چې له دې ډلې څخه ۷۴۹ تنه د فرمان او ۱۳۸ تنه د لوی څارنوالۍ له لارې خلاص شي. غني اړوندو ادارو ته لارښوونه وکړه چې دا فرمان او حکم په لسو ورځو کې تطبیق کړي.