د سولې عالي شورا: طالبان دې له سوله غوښتونکو حرکتونو سره همکاري وکړي

د سولې عالي شورا وایي وسله والو طالبانو ته نه ده په کار، چې د سولې په ملاتړ پیل شوي حرکتونه وځپي او د سولې غږ چوپ کړي. ددغه شورا ویاند غفور احمد جاوید په خپلو تازه څرګندونو کې ویلي وسله والو طالبانو د سولې ولسي حرکت ځنې غړي له ځان سره بېولي دي چې باید ژر تر ژره یې خوشي کړي. دده په خبره طالبانو ته په کار ده، چې له دغه ډول ولسي حرکتونو سره کلکه همکاري وکړي. د سولې ولسي خوځښت وايي، چې دوی موسی کلا کې د طالبانو مرکزونو ته تللي، خو دغه ډلې یې تر ۲۴ پورې ملګري له ځان سره بېولي دي. ددوی په خبره وسله والو طالبانو ډاډ ورکړی چې دغه کسانو ته ستونزې نه جوړوي، خو دوی له طالبانو په دې اړه د وضاحت غوښتنه کړې. د سولې ولسي حرکت غړي وایي طالبان دې ددوی د ملګرو برخلیک روښانه کړي.