واشنګټن ایکزماینر: طالبان د بهرنیو ځواکونو وتل غواړي خو سوله نه غواړي

واشنګټن ایکزماینر په یوه مقاله کې په افغانستان کې روان تاوتریخوالي او د سولې روانو خبرو ته اشاره کړې ده. نشریه زیاتوي له روان وضعیت معلومېږي چې طالبان په هر قیمت د بهرنیو ځواکونو وتل غواړي خو سوله نه غواړي. د سرچینې په وینا طالبانو تاوتریخوالی نه دی کم کړی، له افغان حکومت سره یې خبرو ته تیاری نه دی ښودلی، د اوربند منلو ته تیار نه دي، خو د بهرنیو ځواکونو وتلو باندې بیا ټینګار کوي. په مطلب کې راځي امریکايي ځواکونو ته بیا په کار ده، چې له دغه هېواد ووځي ځکه حضور یې په دغه هېواد کې بې ګټې او بې اغېزې دی. نشریه لیکي له افغانستان به بیا هېڅ وخت د سپټمبر پېښه تکرار نه شي، ځکه هغه وخت د امریکا په حکومت کې ستونزې موجودې وې چې اوس ختمې شوې دي. دغه نشریه دا هم کاږي چې له طالبانو دا تمه کول هم په کار نه دي چې ګواکي دوی به د ترهګرۍ پر ضد مبارزه کوي او یا به له ترهګرو سره همکاري نه کوي. سرچینه زیاتوي چې د امریکا د امنیت دتامین لپاره په افغانستان کې د سرتېرو حضور نه دی مهم، خو د استخباراتي ادارو پیاوړي کول او په حکومت کې همغږي مهمه ده.