د پاکستاني پوځ ویاند: ښایي ډېر شمېر نادرکه شوي کسان افغان طالبانو سره وي

د پاکستاني پوځ ویاند اصف غفور وایي، پاکستان کې د نادرکه شویو ټولو کسانو پړه باید پر حکومت ونه تپل شي. نوموړي دا څرګندونې د انساني حقونو دفاع په نوم د یو تنظیم له مشرې امینه مسعود جنجوعه سره لیدنه کې کړې دي. غفور زیاته کړې، ټول خلک د بې درکه شویو کسانو پړه پر ریاست اچوي چې دا نامناسبه ده ځکه د نوموړي په خبره ښایي ډېر شمېر نادرکه شوي له طالبانو سره په افغانستان او یا په نورو جنګي سیمو کې وي. نوموړی دا څرګندونې په داسې حال کې کوي چې له پاکستاني حکومته د پښتون ژغورنې غورځنګ یوه اساسي غوښتنه د زرګونو نادرکه شویو پښتنو ده چې د دوی په خبره پاکستان یا وژلي او یا یې په یو ډول نه یو ډول د ترهګرۍ قرباني کړي دي. دوی دا غوښتنه ډېر پخوا کړې خو پوځ تر اوسه ورته غبرګون نه وو ښودلی. اوس به ظاهراً پوځ همدا خبره د پښتون ژغورنې غورځنګ مشرانو ته هم کوي ځکه په همدې توګه غواړي ځان د پښتنو له مزاحمتونو په امان کړي.