زلمی خلیلزاد:  د خبرو دا پړاو تر ټولو مهم او له پرمختګونو ډک دی

امریکايي لوری له طالبانو سره په اووم پړاو خبرو کې د مهمو پرمختګونو خبره کوي. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي چې د خبرو دا پړاو تر ټولو مخکینیو پړاوونو له مثبتو لاس ته راوړنو ډک و. دده په وینا د توافق په څلورو واړو برخو کې مهم پرمختګونه شوي دي خو لا ډېر بحثونه به د روانې میاشتې په نهمه نېټه کېږي. زلمي خلیلزاد ویلي د سرتېرو د ایستلو، د چا پر وړاندې د افغان خاورې د نه کارولو، بین الافغاني مذاکراتو او دایمي اوربند په اړه مهم او د پام وړ پرمختګونه شوي دي. تېره ورځ د قطر دفتر ویاند سهیل شاهین هم ویلي وو، چې دواړه لوري د خبرو له بهیر راضي دي او مثبتو پایلو ته نږدې شوي دي. زلمي خلیلزاد او سهیل شاهین په دې اړه تر دې ډېر جزیات نه دي ورکړي.