سره له دې چې د قطر په پلازمېنه دوحه کې د طالبانو او افغان سیاسي څېرو ترمنځ د سولې په اړه بینالافغاني غونډه جوړه شوې ده، خو په غزني او ځینو نورو ولایتونو کې خونړۍ پېښې شوې دي. همدا تېره ورځ د غزني د ښار سکون یوې قوي او بوږنوونکې چاودنې له منځه یوړ. سهار خلک نوي د هټیو په لور خوځېدلي وو، ښوونځیو کې تدریس پيل شوی و، چې د چاودنې بوږنوونکي غږ هر څه ګډوډ کړل. د غزني ښار یې په وینو ولاړه او ثابته یې کړه چې د جګړې غږ لا هم په ښارونو کې شته دی. طالبانو د برید مسوولیت ومانه او ادعا یې وکړه، چې د ملي امنیت ریاست پورې اړوند یو ریاست یې په نښه کړی دی.
ویل کېږي چې د ملي امنیت ریاست یو کوچنی کنډک په یوه کور کې پروت و. وسله والو طالبانو پر همدې کور د موټر بم برید کړی دی. په سیمه کې هټۍ، کورونه، ملکي ادارې او دوه ښوونځي هم وو. ښوونځي، کورونه، هټۍ او نورې ادارې په پېښه کې سختې زیانمنې شوې دي. په سیمه کې عیني شاهدان وايي چې د سیمې نږدې ټولو کورونو ته کم او زیات زیان اوښتی دی. د پېښې یوه عیني شاهد وویل، چې په پېښه کې د نوموړي د کورنۍ په ګډون، د سیمې د نورو کورنیو غړي هم ټپیان شوي دي. نوموړي ويلي: ((دوکان ته نوی رسېدلی وم چې لوګی پورته شو، بوږنوونکی غږ و، بېرته کور ته راغلم، د کاکا کور مې په بشپړه توګه ویجاړ شوی دی، څلور کسه ټپیان لرو. یو نارینه دی، دوه ماشومان او یوه ښځينه)).
د عامې روغتیا وزارت وایي چې د پېښې له سیمې ۱۴۹ ټپیان وروړل شوي دي چې ډېره برخه یې ملکي وګړي دي. په پېښه کې د څلورو ملکیانو په ګډون، ۱۲ کسان وژل شوي دي. د پېښې ډېره برخه ټپیان د چاودنې سیمې ته د نږدې ښوونځي زده کوونکي دي. دوی ډېری د غزني په ملکي روغتون کې تر درملنې لاندې دي او ځینې یې تر لومړنیو درملنو وروسته رخصت شوي دي.
وسله وال طالبان وایي چې په برید کې یې د ملي امنیت د ادارې ډېر کسان وژلي دي. خو عیني شاهدان بیا وايي چې تر ډېره ټپیان د ښوونځي زده کوونکي دي. د ښوونځي یوه زده کوونکي چې سر یې تړلی و، د لاس او مخ په برخه کې یې سخت ټپونه لیدلي وو، وویل چې پېښه خورا وحشتناکه وه. نوموړي ویلي: ((دویم درسي ساعت مو پیلېده چې ډېر دروند غږ شو، بیا نه یم پوه شوی، خو په روغتون کې په هوښ شوم، زموږ د ښوونځي ډېر زده کوونکي دلته بستر دي)).
بل پلو په قطر کې له امریکایي لوري سره د طالبانو خبرې روانې دي، خو د بینالافغاني کنفرانس لپاره دوه ورځې ځنډول شوې دي. د چارو ډېری شنونکي پر دې باور دي چې طالبان د امتیاز اخیستلو په خاطر دغه ډول بریدونه کوي، خو په دې توګه دوی نه شي کولی د سولې په روانه پروسه کې امتیازات واخلي. دوی ټینګار کوي چې دغه ډول فعالیتونه به د سولې هڅې زیانمنې کړي او له دواړو لورو به د خلکو کرکه ډېره کړي.
