سره له دې چې په دوحه کې افغان پلاوي او طالبانو د ملکي وګړو د تلفاتو پر مخنیوي تفاهم کړی دی او په دې اړه یې پرېکړه لیک صادر کړ، خو څو ساعته وروسته په بغلان او وردګو ولایت کې ملکي وګړي په نښه شوي او پر کورونو هوایي بریدونه شوي دي. دغه بریدونه د ملي شورا غړو، ځایي چارواکو او د ټولنیزو شبکو کاروونکو غندلي دي او په اړه یې اعتراضونه کړي دي.
تېره ورځ د دوحې تر بینالافغاني ناستې وروسته یو پرېکړه لیک صادر شو، دواړو لورو پرېکړه وکړه چې د عامه تاسیساتو ساتنه به کېږي، پر کلینیکونو به بریدونه نه کېږي، ښوونځي به مصؤن وي او د ملکي وګړو د ژوند خوندیتابه ته به پاملرنه ډېرېږي. خو برعکس د جګړې ډګر بیا خونړی دی او لا هم افغان ملکي او بې دفاع وګړي د دې جګړې قربانیان دي. تازه په بغلان او وردګو ولایت کې بوږنوونکې پېښې شوې دي او د خلکو غبرګون یې پارولی دی.
د دغو خونړیو پېښو لومړۍ یې د بغلان ولایت د ډنډ شهابالدین قطب خېلو سیمه کې د بې پیلوټه الوتکې د هوایي برید له امله رامنځ ته شوه او په دې هوایي برید کې د یوې کورنۍ اووه غړي ووژل شول، چې ښځې او ماشومان هم پکې شامل دي. له دې پېښې وروسته د سیمې خلکو د اعتراض په ډول د قربانیانو جنازې له ځان سره د کابل شمال لویې لارې ته راوړې او دغه لاره یې د اعتراض په ډول وتړله. دوی د حکومت او خپلسرو هوايي بریدونو پر ضد شعارونه ورکول او د دغه پېښې د پلټنې غوښتنه یې کوله. د سیمې یو کس اوسېدونکی خان محمد ویلي، بهرنیو ځواکونو پر عامو وګړو برید کړی دی او واړه واړه ماشومان یې وژلي دي. نوموړی وايي: ((یوه بجه د شپې وه، نه جنګ و نه جګړه وه، خو الوتکه راغله او بم یې وغورځاوه. وروسته پوه شو چې پر یوه کور یې بم غورځولی دی او ټول یې د یوې کورنۍ غړي شهیدان کړي دي)).
ځايي خلک وايي چې حکومت باید دغه پېښه وڅېړي او معلومات یې له خلکو سره شریک کړي. د بغلان د ولایتي شورا غړی شمسالحق بارکزی وایي، فکر نه کوي چې حکومت دې دغه پېښه وڅېړي. د هغه په خبره، حکومت په ځلونو د پېښې د څېړلو امر کړی دی.
بل پلو د وردګو ولایت په جلګه کې بهرنیو او کورنیو ځواکونو پر یوه کلینیک عملیات کړي چې د دغه کلینیک څلور ډاکټران او یو ناروغ یې وژلي دي. د میدان وردګو ولایت د ولایتي شورا غړی اخترمحمد طاهري دغه برید تاییدوي او وایي دا ډول وحشتناک بریدونه د ولس او حکومت ترمنځ واټن ډېروي. په دې عملیاتو کې ګډو ځواکونو څو کارکوونکي له ځان سره بېولي هم دي. اخترمحمد وايي: ((دغه ډول بریدونه وحشتناک او جنګي جنایت دی. په دې حساسو شرایطو کې د ملکیانو تلفات سخت غبرګون پارولی شي او باید نور دا لړۍ ودرول شي)).
د ولسي جرګې غړي هم دغه ډول بریدونه په کلکو ټکو غندي او د درېدو غوښتنه یې کوي. د مشرانو جرګې رییس فضل الهادي مسلمیار هم پر ملکیانو بریدونه جنګي جنایت بللی دی او د هغه د تکرار د مخنیوي غوښتنه یې کړې ده. پخواني ولسمشر حامد کرزي هم دغه ډول بریدونه جنګي جنایت بللی دی او د درېدو غوښتنه یې کړې ده.
