د دوحې پر دوه ورځنۍ غونډه؛ ګڼو هېوادونو مثبت نظرونه څرګند کړي دي

د اروپايي ټولنې د بهرنۍ پالیسې او امنیت ویاندې دغه غونډه ستایلې او هغه یې د راتلونکو خبرو لپاره غوره فرصت او اساس بللی دی. مېرمن کوچیانچیچ وایي اروپايي ټولنه د بین الافغاني مذاکراتو ملاتړ کوي او دا د افغان جګړې د پای ته رسېدو یوازینۍ حللاره بولي. د افغانستان لپاره د ملګرو ملتونو استازي تادامیچی یامموتو هم د قطر دوه ورځنۍ خبرې مهمې او د راتلونکې لپاره ښه بنسټ بللې دي. بل پلو د ازبکستان د بهرنیو چارو وزارت هم ددوحې غونډې ته هیله مندي ښودلې ده او وایي چې د افغانستان د سولې په پروسه کې هر ډول همکارۍ ته تیار دي. سرچینه وايي، دوی تیار دي چې د افغان جګړې په پای ته رسولو کې اړینه همکاري وکړي او دغه هېواد ته د امنیت او ثبات په راوستو کې خپل رول ترسره کړي.