متقاعد امریکايي افسران:  د افغانستان او عراق جګړې بې مانا او بې ارزښته دي

متقاعدو امریکايي افسرانو پیو پابلیک په یوه نظرپوښتنه کې برخه اخیستې ده او د افغان جګړې په اړه یې نظرونه ورکړي دي. لوړه سلنه متقاعدو افسرانو د افغانستان او عراق جګړې، بې ګټې او بې ارزښته بللې دي. ددوی په خبره دغه جګړې د امریکا د امنیت لپاره هېڅ اهمیت نه لري او له دغه هېوادونو د امریکا امنیت ته ډېر لږ یا هېڅ خطر متوجه نه دی. دغه سروې کې له ۱۳۰۰ متقاعدو افسرانو سره مرکې شوې دي. له دې ډلې ۵۸ سلنه افسرانو ویلي چې د افغانستان جګړه بې ارزښته ده او امریکا ته ګټه نه لري خو ۳۸ سلنه کسانو بیا ارزښتمنه بللې ده. تر دې وړاندې هم د افغان جګړې په اړه له پخوانیو امریکايي نظامیانو سره ورته مرکې شوې دي او دوی هم ژر تر ژره له افغانستان د امریکايي ځواکونو پر ایستلو ټینګار کړی دی.