بهرنیو چارو وزارت: راتلونکې بین الافغاني ناسته به له لاسته راوړنو ډکه وي

د هېواد د بهرنیو چارو وزارت وایي، د افغانانو ترمنځ راتلونکې ناسته به جامع، مهمه او له لاسته راوړنو ډکه وي. د یاد وزارت ویاند صبغت احمدي وایي، ټاکل شوې ډېر ژر د سیمې په یو هېواد کې د افغانانو ترمنځ بله مهمه ناسته جوړه شي. په ورته وخت کې د سولې عالي شورا وایي، تمه ده چې دا ناسته د افغان حکومت او طالبانو ترمنځ مخامخ خبرو ته زمینه مساعده کړي. د سولې شورا ویاند غفور احمد جاوید وایي، دوی د ټولو هغو هېوادونو له هڅو ملاتړ او قدردانی کوي چې د افغان سولې برخه کې یې کوي. بلخوا طالبانو ته نږدې سرچینو ویلي، دوی به په راتلونکې بین الافغاني ناسته کې پر ډېرو مهمو او جدي مسایلو بحث وکړي.