ننګرهار کې د واده پر مراسمو ځانمرګی برید شوی

د ننګرهار په پچيراګام ولسوالۍ کې د واده په مراسمو کې د ځانمرګي بريد له امله ٥ کسان وژل شوي او ٤٠ نور ټپيان دي. د ننګرهار د والي وياند عطاالله خوږياڼي وویل، چې نن سهار په پچيراګام ولسوالۍ کې د ملک تور په نامه د پاڅونوالو د يوه قوماندان د وراره د واده په مراسمو کې ځانمرګى بريد شوى دى. خوږياڼي وويل چې بريد د يوه تنکي ځوان په وسيله سهار له اتو بجو وروسته د واده د مراسمو په ګڼه ګوڼه کې شوى. د هغه په وينا، تراوسه د لومړنيو معلوماتو له مخې، پنځه کسان وژل شوي او تر ٤٠ زيات ټپيان دي.ده زياته کړه چې د ټپيانو د انتقال لپاره اقدام شوى او سيمې ته امنيتي ځواکونه رسېدلي دي. د پچيراګام ولسوال حضرت خان خاکسار پېښه تایید کړې او وايي چې يوشمېر ټپيان د پچیر اګام کلینیک او نور د جلال اباد ملکي روغتون ته انتقال شوي دي. تراوسه ددې بريد مسووليت چا نه دى منلى.