د ولسي جرګې معترضې نوماندانې وایي، له تېرو دریو میاشتو راهیسې یې څوک د عدالت غږ نه اوري. معترضینو، چې تر ارګ وروسته یې د سترې محکمې مخې ته پرلت پیل کړی وایي، له تېرو دریو میاشتو راهیسې یې د ارګ مخې ته اعتراض وکړ، خو چا یې پوښتنه ونه کړه او که یې څوک غږ نه اوري، نو له دوی څخه دې د افغانستان هویت واخیستل شي.
د ولسي جرګې په تېرو ټاکنو کې تر پراخو درغلیو او تورونو وروسته، ځینې ښځینه نوماندانو اعتراضونه پيل کړل. دوی ادعا کوي چې حق یې خوړل شوی دی او ګواکې د پیسو په بدل کې د دوی پر ځای نورې نوماندانې ولسي جرګې ته بریالۍ کړل شوې دي. خو حکومت د میاشتو په تېرېدو لا هم د دغو معترضو نوماندانو غږ نه دی اورېدلی. دوی د دې غوښتونکې دي چې حکومت دې ځانګړې محکمه ورته جوړه کړي، که یې رایې درلودې، بریالۍ دې شي او له دې پرته دې د دوی پر حقوقو سترګې نه پټېږي.
دغه معترضې نوماندانې وايي، د ارګ له مخې څخه په زور شړل شوې او اوس د عدالت غوښتلو لپاره د سترې محکمې مخې ته راغلې دي او د عدالت غوښتنه کوي. دوی وايي، د ولسي جرګې په ټاکنو کې فساد شوی او ستره محکمه باید د دوی اسناد وڅېړي. د ولسي جرګې ټاکنو ته نومانده ډېوه نیازۍ وایي: ((د سترې محکمې مخې ته مو خېمه وهلې ده. دوی باید د فساد قضیه وڅېړي. ټولو ته بربنډه او واضح ده چې په تېرو ټاکنو کې څومره فساد وشو. د قضایه قوې دنده ده چې دغه قضیې وڅېړي)).
معترضې نوماندانې ادعا کوي چې مخکې یې د اجرایه قوې مخې یا ارګ سره پرلت کړی و، خو حکومت یې غږ نه دی اورېدلی او اوس اړ شوې چې د سترې محکمې مخې ته راشي. نوماندانې وايي، په تېرو اعتراضونو کې ورسره ناوړه چلند شوی دی او حقوق یې تر پښو لاندې شوي دي. د ولسي جرګې نومانده فرزانه فرهمند وايي: ((څه باندې دری نیمې میاشتې وشوې چې اعتراض مو کړی دی، خو هېڅوک زموږ غږ نه اوري. دوی زموږ عریضې او اسناد نه څېړي)).
د ولسي جرګې نوماندانې وايي، ستره محکمه یې وروستۍ مرجع ده چې دوی ترې د عدالت تمه لري. د نوماندانو په خبره، هر ارګان ورته وایي چې دا قضیه په دوی پورې اړه نه لري او دا مسئله نوره تړل شوې ده. نوماندانې وایي، سره له دې چې د ټاکنو کمېسیون پخواني غړي او مشران د فساد په تور له دندو لرې کړل شول، خو حکومت یې پایلې او کړنې باوري ګڼي.
د ولسي جرګې نوماندانې وايي، که یې حکومت غږ نه اوري، نو له دوی دې د افغانستان تابعیت واخیستل شي. د دوی په خبره، کله چې حکومت د افغانانو په سترګه نه ورته ګوري، نو هویت، پاسپورت او تابعیت دې ترې واخیستل شي.
دغه معترض نوماندان له ارګ وروسته د سترې محکمې مخې ته داسې مهال خپل اعترض پيلوي، چې په زنبق څلورلارې کې د دوی د اعتراض پر وړاندې څو ځله له تشدده کار واخیستل شو، چې حتی د ځینو دغو نوماندانو لاسونه د تاورتریخوالي پر مهال مات شول.
د ولسي جرګې د تېرو ټاکنو کړکېچنو ستونزو ته په کتو ډېری خلک پر دې باور دي، چې ښایي د ټاکنو کمېسیون راتلونکې ولسمشریزې ټاکنې هم په سمه توګه تر سره نه شي کړی. پر ټاکنو څارونکي بنسټونه هم په دې اړه اندېښنه لري او وایي، ښايي راتلونکې ټاکنې له کړکېچه ډکې وي.
