ګډو ځواکونو یو ځل بیا په وردګو ولایت کې بشري جنایت تر سره کړی دی. سره له دې چې په وار وار خلکو د روان وضعیت په اړه خپل غږ پورته کړی دی او د دغه ډول بریدونو د درېدو غوښتنه یې کړې، خو ګډو ځواکونو یو ځل بیا په جغتو کې عام افغانان په نښه کړي دي. د راپورونو له مخې، د میدان وردګ په جغتو ولسوالۍ کې د ګډو ځواکونو په شپنیو عملیاتو کې ۱۶ ملکي وګړي وژل شوي دي. د قربانیانو کورنۍ وايي چې ګډو ځواکونو تېره شپه ناوخته په جغتو کې د ملکي خلکو په کورونو عملیات کړي، چې یوازې د یوه کس څلور زامن وژل شوي. دوی وایي، وژل شوي کسان محصلین، زده کوونکي او میلمانه وو، چې د غنمو درمند د راټولولو لپاره په یوه کور کې سره را ټول شوي وو.
عیني شاهدان وايي، په دې عملیاتو کې د یوه کس څلور زامن وژل شوي، نور هغه محصلین، زده کوونکي او میلمانه وو چې د غنمو د درمند راټولولو لپاره په یوه کور کې راټول شوي وو. د پېښې یو تن عیني شاهد چې له سترګو یې اوښکې روانې وې وايي: ((دا ډول وحشت ما هېڅ وخت نه و لیدلی. اولنی کس زه وم چې کوټې ته د ننه شوم. ډېر یې ملکي خلک وژلي دي. حکومت ستر وحشت کړی دی او باید په دې اړه ځواب ووايي)).
د سیمي خلک وايي چې په دې پيښه کې وژل شوي کسان ملکيان، زده کوونکي او محصلین دي چې له وسله والو طالبانو سره یې تړون نه در لود. دوی وايي، چاپه د ګډو ځواکونو له لوري د شپې په دریو بجو وهل شوې چې پکې د یوې کورنۍ څلور او د بلې کورنۍ دری غړي وژل شوي. د سلیمان په نامه د سیمې اوسېدونکی وايي: ((وژل شوي ټول ملکیان دي. څو کسه زما د کورنۍ غړي دي. د دوی عمرونه د اتلسو او اولسو کلونو ترمنځ وو. دوی له طالبانو سره هېڅ راز اړیکه نه درلوده)).
له دې وړاندې هم ګډو ځواکونو د شپنیو عملیاتو پر مهال په میدان وردګ، پکتیکا، اروزګان او ډېرو نورو ولایتونو کې ملکي تلفات رامنځ ته کړي چې د خلکو له کلک غبرګون سره مخ شوي دي. د ملي شورا غړي له امنیتي ادارو غوښتنه کوي چې د عملیاتو پر مهال د ملکي وګړو ژوند ته جدي پاملرنه وکړي. د ولسي جرګې غړي عبیدالله کلیمزي ویلي چې حکومت باید نوره دا لړۍ ختمه کړي. نوموړي زیاته کړې: ((دا یوه ورځ نه ده، دا دوې نه دي. هره ورځ ملکي خلک په میدان وردګو ولایت کې وژل کېږي او شپني عملیات تلفات ورته اړوي. حکومت باید نور د خلکو حوصله و نه ازمويي)).
ملي دفاع او کورنیو چارو وزارتونه په میدان وردګ ولایت کې د تېرې شپې چاپې په تړاو وایي، چې دغه عملیات د دوی له لوري نه؛ بلکې د صفر یو قطعې له خوا تر سره شوي دي. بل پلو د میدان وردګو ولایت مقام بیا په دې اړه وایي، چې وژل شوي ډېری طالبان او د هغوی د سرې قطعې غړي وو. وسله والو طالبانو هم د یوې خبرپاڼې په خپرولو سره ویلي چې په دغو عملیاتو کې ملکي وګړي وژل شوي دي او وسله والو طالبانو ته پکې تلفات نه دي اوښتي.
