د حکومت اجرايه رییس وایي، په راتلونکو ولسمشریزو ټاکنو کې باید د تېرو تجربو د تکرار مخه ونیول شي. عبدالله عبدالله وایي، که د ولسمشرۍ په راتلونکو ټاکنو کې یوځل بیا د تېرو ټاکنو ناکامې تجربې تکرار شي، ستره فاجعه به رامنځ ته او هیواد به د بحران خواته ولاړ شي. عبدالله چې په ټاکنو کې یې د ښځو د ګډون په اړه پرون دری ورځني سمینار ته خبرې کولې، په ټاکنو کې پر شفافیت ټینګار وکړ او وایي، حکومتي بنسټونه باید له دې پروسې ځانونه لرې وساتي او پکې مداخله ونه کړي.
د راتلونکو ټاکنو د نه شفافیت او په وخت د نه تر سره کېدو په تړاو تر اندېښنو وروسته، د حکومت اجرایه رییس خبرداری ورکوي چې په راتلونکو ټاکنو کې دې د تېرو ټاکنو ناکامې تجربې نه تکرارېږي.
عبدالله عبدالله چې په ټاکنو کې د ښځو د ګډون په تړاو یوې غونډې ته وینا کوله وویل، په راتلونکو ټاکنو کې دې هغه غیر قانوني کړنې هم نه تکرارېږي چې د ولسي جرګې په ټاکنو کې تر سره شوې او دغه ټاکنې یې له ډېرو ستونزو سره مخ کړې.
نوموړی وایي، که په راتلونکو ټاکنو کې تېرې ستونزې تکرار شي، هیواد د بحران پر لوري ځي او ښايي فاجعه رامنځ ته شي. نوموړی وايي: ((د ۲۰۱۴ کال د ټاکنو د ستونزو او تېروتنو تکرار به په هېواد کې یوه ستره فاجعه رامنځ ته کړي. د دې فاجعې د زغملو توان به بیا د افغانستان خلک ونه لري)).
عبدالله عبدالله وايي، حکومتي بنسټونه باید له دې پروسې لرې وساتل شي، څو د کمېسیونونو په چارو کې لاسوهنه ونه شي. نوموړی وايي، ټولې حکومتي ادارې دې په ټاکنو کې په پراخه توګه ګډون وکړي، خو خبرداری ورکوي چې هیڅ حکومتي اداره حق نه لري، چې د یوه مشخص نوماند په ګټه کار وکړي او یایې هم پر ضد تبلیغات تر سره کړي.
عبدالله زیاتوي:((هر څوک حق لري چې د خپلې خوښې نوماند ته رایه ورکړي؛ خو ټولې حکومتي ادارې باید له دې پروسې لرې وساتل شي. دوی باید د کمېسیونونو په چارو کې لاسوهنه و نه کړي. امنیتي، دفاعي او نور بنسټونه باید نه کوم نوماند ته کمپاین وکړي او نه هم د کوم نوماند په تخریب لاس پورې کړي)).
په ورته وخت کې د ټاکنو خپلواک کمېسیون رییسه حوا علم نورستانۍ وايي، د راتلونکو ولسمشریزو ټاکنو لپاره چمتووالی لري او پر خپل وخت د ټاکنو په تر سره کېدو ټینګار کوي. نوموړې وايي: ((کمېسیون راتلونکو ټاکنو ته بشپړ تیاری لري، خو د خلکو ملاتړ کولی شي دغه پروسه بریالۍ کړي. د خلکو همکاري کولی شي د شفافو ټاکنو زمینه برابره کړي)).
د حکومت اجرایه رییس عبدالله عبدالله په راتلونکو ولسمشریزو ټاکنو کې د تېرو تجربو د تکرار د مخنیوي خبره داسې مهال کوي، چې د ولسي جرګې په تېرو ټاکنو کې پراخې درغلۍ شوې دي او ان د ټاکنیزو کمېسیونونو ټول پخواني کمېشنران د فساد په تور محکمې ته معرفي شوي.
د تېرو ټاکنو ځینې نوماندان لا هم اعتراضونه کوي او پر ټاکنو نیوکې لري. دوی وایي چې په ټاکنو کې فساد شوی دی او د دوی حقوق تر پښو لاندې شوي دي. بل پلو پر ټاکنو څارونکي بنسټونه هم د راتلونکو ټاکنو په اړه اندېښنه ښيي او وایي، د ټاکنو کمېسیون په چارو کې د اړتیا وړ چټکتیا نشته ده، نو ښايي راتلونکې ټاکنې له ستونزو سره مخ شي.
