افغان چارواکي: د سولې د ښه نیت په موخه نور طالب بندیان هم خوشي کېږي

حکومت د خوشي کولو په موخه د یو شمېر طالب بندیانو د دوسیو څېړنه پيل کړې ده. یو شمېر حکومتي چارواکي وایي چې د سولې د خبرو د برخې په توګه حکومت په دې وروستیو کې د طالب بندیانو د دوسیو څېړنه پيل کړې ده او غواړي یو شمېر طالب بندیان له زندانونو ازاد کړي. د سولې لپاره ددولت وزیر سلام رحیمي ویلي تر دې وړاندې هم ګڼ طالبان له افغان زندانونو د سولې د ښه نیت په موخه ازاد شوي او حکومت غواړي د همدې هڅو په دوام یو شمېر نور طالب بندیان هم ازاد کړي. څه موده مخکې ولسمشر غني د یوه فرمان له مخې نږدې ۹۰۰ طالب زندانیان ازاد کړل او ورپسې یې د اختر په مناسبت هم د ځينو بندیانو د ازادۍ امر ورکړ. حکومت وايي له دې هڅو یې موخه دا ده، چې د سولې په برخه کې پرمختګونه وشي او افغان جګړه ختمه شي. رحیمي بیا ټینګار کوي چې دا ځل حکومت له نوو لارو او نوو پلانونو سره د سولې خبرې مخ ته وړي.