ټاکنیز کمېسیونونه وايي، دوی خپل کار په پوره شفافیت تر سره کوي او په ټاکنو کې به هېڅ کورني یا بهرني فشار ته تسلیم نه شي. تازه ټاکنیزو کمېسیونونو یوه هوکړه لاسلیک کړې چې له مخې یې همغږي زیاتېږي او هڅه به کېږي چې په ګډه د ټاکنیزو درغلیو او عدم شفافیت مخنیوی وکړي. د ټاکنیزو کمېسیونو ترمنځ د دې هوکړې د لاسلیک پر مهال مسوولانو ویلي چې هېڅ کورني او بهرني فشار ته به تسلیم نه شي.
سره له دې چې لا هم د ټاکنو د شفافیت په اړه اندېښنې موجودې دي او ولس دا وېره لري چې ښایي رایه یې ځای ونه نیسي، تازه د ټاکنیزو کمېسیونونو مشران وایي چې حق به حقدار ته رسوي. د دوی په خبره، هېڅ کورني یا بهرني فشار ته نه تسلیمېږي او شفافو ټاکنو ته ژمن دي. د ټاکنیزو کمېسیونونو مسوولانو یوې ګډې خبري ناستې ته وویل، چې د دواړو لورو ترمنځ دا تفاهم لیک له دوی سره د شفافو ټاکنو د تر سره کېدو په برخه کې مرسته کوي.
د ولسمشرۍ ټاکنو تر سره کېدو ته د ګوتو په شمار ورځې پاتې او انتخاباتي کمېسیونونه ډاډ څرګندوي، چې د میزان په شپږمه ولسمشریزو ټاکنو تر سره کېدو ته پوره چمتووالی لري. د ټاکنیزو کمېسیونونو له دې څرګندونو، چې ګواکې هېڅ راز کورني یا بهرني فشار ته به تسلیم نه شي، ښکاري چې ځینې کړۍ غواړي د دغه کمېسیون پر کړنو نفوذ ولري. تر دې وړاندې هم په ولس کې دا وېره وه، چې ښایي ټاکنې وشي، خو د تېر په څېر یې پایلې د یوه درېیم هېواد د استازي له لوري روښانه شي. خو تازه ټاکنیز کمېسیونونه د فشار د نه منلو ډاډ ورکوي.
د ټاکنیزو شکایتونو کمېسیون رییسه وایي، دوی ژمن دي چې شفافې ټاکنې تر سره کړي او د دغه ټاکنو په لار کې ټول خنډونه له منځه یوسي. زهره بیان شینوارې وايي: ((په دې توګه به موږ په خپلو چارو کې نوره همغږي هم رامنځ ته کړو. موږ به د چا فشار و نه منو او ټاکنې به د خلکو د باور وړ وي)).
د ټاکنو خپلواک کمېسیون رییسه بیا وایي چې دوی د ټاکنو لپاره ټول اړین تدابیر نیولي دي او ټاکنې به په خپل وخت تر سره کېږي. د حوا علم نورستانۍ په خبره، کمېسیون ټولې چارې مهالوېش ته په کتو تنظیم کړې دي او امنیتي ادارې پوره همغږي ورسره لري. نوموړې وايي: ((موږ ټاکنو ته ټوله تیاري نیولې ده. په ټاکنو کې به هېڅ راز کورني یا بهرني فشار ته تسلیم نه شو، بلکې د ولس حقوقو او رایې ته به ژمن وو)).
په داسې حال کې چې ټاکنیز کمېسیونونه د میزان په شپږمه د ولسمشریزو ټاکنو د تر سره کولو خبره کوي، د عنایت الله حفیظ په مشرۍ ټاکنیز ټیم په یوه خبري ناسته کې د ټاکنو د ځنډ غوښتنه کوي. نوموړی د یادې غوښتنې دلیل غیر عادلانه انتخاباتي سیالۍ ګڼي. د ده په خبره، ځینې ټاکنیز ټیمونه له دولتي امکاناتو په استفادې هڅه کوي، چې ټاکنې د ځان په ګټه وڅرخوي او په ټاکنو کې ښایي لاسوهنه وکړي. نوموړی وايي: ((ټاکنیز ټیمونه له دولتي امکاناتو استفاده کوي. دوی ښايي په ټاکنو کې درغلي وکړي او ټاکنې په خپله ګټه تمامې کړي. له همدې امله ښه دا ده، چې ټاکنې وځنډول شي)).
خو د ټاکنیزو شکایتونو کمېسیون د نوموړي غوښتنې ته په غبرګون کې وايي، چې اسناد دې وړاندې شي، څو ستونزو ته رسیدګي وشي.
د راتلونکو ولسمشریزو ټاکنو لپاره ټاکنیز کمپاینونه د اسد یا زمري په شپږمه پیل شوي وو، چې پای ته رسېدو ته یې کمې ورځې پاتې دي او تر هغه وروسته به ولسمشریزې ټاکنې تر سره کېږي. لا هم امنیت، د فساد موجودیت، له دولتي امکاناتو د ځینو نوماندانو استفاده او دې ته ورته نورې هغه ستونزې دي، چې د شفافو ټاکنو په لار کې یې ستر خنډونه بللی شو.
