ویلیم برد: د افغان حکومت او سترو مرسته کوونکو ترمنځ اړیکې خرابې دي

د افغان حکومت او سترو مالي ملاتړو ترمنځ یې اړیکې خرابې شوې دي. په کابل کې د نړیوال بانک پخواني مشر ویلیم برد ویلي، په دې وروستیو کې د افغان حکومت او ددغه هېواد د سترو مالي مرسته کوونکو او ملاتړو ترمنځ اړیکې خرابې شوې دي. دده په خبره د فساد موجودیت او په ځینو مهمو اداراتو کې د ولسمشر غني خپلسرو لاسوهنو دغه اړیکې کمزورې کړې دي. هغه زیاته کړې، کابو یو کال کېږي چې مرسته کوونکي هېوادونه له افغان حکومت سره د مرستو او مالي همکاریو په برخه کې ښې اړیکې نه لري. ویلیم زیاتوي، چې ولسمشر غني د تدارکاتو اداره رامنځ ته کړې ده او په دې توګه یې چارې په یوه ځای کې متمرکزې کړې دي چې ورسره جوخت د فساد د تمرکز زمینه هم برابره شوې ده. نوموړی دغه راز وايي چې په مالیې، کانونو، صنعت او تجارت وزارتونو کې د ولسمشر غني غیر مسلکي او سیاسي ګومارنې هم ددې سبب شوې چې مالي ملاتړي هېوادونه له افغان حکومت سره ښې اړیکې و نه لري. هغه خبرداری ورکړی چې د دولتي ادارو سیاسي کول د افغانستان په زیان دي.