فیفا: د ټاکنو پر وړاندې ځینې ستونزې نه دي حل شوي

پر ټاکنو د څار بنسټونه په هېواد کې د ټاکنو بهیر د څار لپاره له ۱۱زرو د ډېرو کسانو د ګومارنې خبر ورکوي او وايي چې د دغه بهیر پر وړاندې لاهم جدي اندېښنې موجودې دي. په افغانستان کې د ازادو او عادلانه ټاکنو د موسسې «فیفا» اجرایوي رییس یوسف رشید وايي، دغه بنسټ په ټول هېواد کې د ټاکنو بهیر د څار په موخه شپږ زره کسان ګومارلي دي. نوموړي ناامنۍ، له بایومتریک ماشینونو د سمې کارونې په اړه د ډاډ نه شتون، د ښځو د رایې ورکونې په محلونو کې د ښځو کارکوونکو کمښت، په اووه ولایتونو کې د مخابراتي شبکو پرې کول او نور د دغه بهیر اندېښمن کوونکي موارد ګڼي او له اړوند بنسټونو غواړي چې یادو مواردو ته جدي توجه وکړي. دا په داسې حال کې ده چې وړمه ورځ د ټاکنو کمېسیون او امنیتي ارګانونو د ټاکنو د ترسره کېدو لپاره د لازم تیاري خبر ورکړی و.