غزني کې په یوه هوايي برید کې ۶ ملکي وګړي وژل شوي دي

د غزني په خواجه عمري ولسوالۍ کې د هوايي برید له امله ملکي وګړو ته مرګ ژوبله اوښتې ده. د سیمې اوسیدونکي وایي برید پرون مازدیګر مهال د خواجه عمري ولسوالۍ په ده حاجي سیمه کې شوی چې له امله یې شپږ ملکي وګړي وژل شوي او څلور نور ټپيان دي. د دې برید په غبرګون کې نن سهار د دغه ولایت اوسیدونکو لاریون کړی و. سرچینې وایي اعتراض کوونکي حکیم سنایي سیمه کې د پولیسو له غبرګون سره مخ شوي او اخ و ډب رامنځ ته شوی دی. په دې پېښه کې هم شپږ کسه ټپیان شوي دي. لاریون کوونکي دمګړی د ولایت مقام مخې ته راټول شوي دي او ادعا کوي چې پولیسو مخامخ ډزې ورباندې کړې دي. د غزني ځایي چارواکو تر اوسه په دې اړه رسنیو ته څه نه دي ویلي.