د ټاکنو خپلواک کمېسیون وایي، په ټولو مرکزونو کې رایې شمېرل شوې دي او له مرکز سره د شریکېدو په حال کې دي. د ټاکنو خپلواک کمېسیون تېره ورځ په یوه خبري کنفرانس کې د خبرو پر مهال وویل، چې له څو ولایتونو پرته نور د ټولو ولایتونو رایې مرکز ته رسېدلې دي او دوی به یې څېړنه او شمېرنه پیلوي. د کمېسیون په خبره، د دوی شمېرې ښيي چې تر دوو میلیونو ډېرو کسانو په ولسمشریزو ټاکنو کې برخه اخیستې ده او دا د دوی لپاره ښه زېری دی.
سره له دې چې په ټاکنو کې د خلکو پر کمرنګه ګډون بحثونه کېږي، خو د ټاکنو خپلواک کمېسیون وایي چې د رسېدلو شمېرو له مخې، تر دوو میلیونو ډېرو وګړو په رایې اچونه کې برخه اخیستې ده او د کمرنګه ګډون په تړاو اندېښنې بې ځایه دي. د ټاکنو خپلواک کمېسیون وایي چې په ځینو سیمو کې د ارتباطي ستونزو له امله د رایو شمېره له مرکز سره نه ده شریکه شوې، چې د نن ورځې تر پایه ښایي له دوی سره شریکه کړل شي.
د ټاکنو کمېسیون مرستیال مشر عصمت الله مل وايي، د کابل د ټولو ولسوالیو او ځینو ولایتونو اړوند اسناد مرکزي ته دفتر ته ور رسېدلي او د نورو د لېږدولو بهیر روان دی. د مل په خبره، تر دغې شېبې د شاوخوا دریو زرو رايې مرکزونو د لومړنیو شمېرو له مخې، تر دوو میلیونو ډېرو کسانو په تاکنو کې ګډون کړی دی. د پاتې کابو دوو زرو مرکزونو د شمېرو په ور زیاتولو به د رايو ورکوونکو ټولیز شمېر وروسته معلوم شي. نوموړي وویل: «په ټول هېواد کې له ۳۷۴۶ مرکزونو ۲۱۹۶۴۶۳ کسانو د رایې ورکونې په پروسه کې ګډون کړی دی. خو د پاتې مرکزونو د رایو په را رسېدو سره به د مرکزونو او رایې ورکوونکو شمېره نوره هم لوړه شي».
کمېسیون وایي، د ولسمشرۍ هر نوماند په رایو کې خپله ونډه لري، خو لا هم د هغوی د رایو د سلنې، یا ګټنې یا بایلنې په اړه څه ویل تر وخت وړاندې دي. کمېسیون دغه راز پر هغه چا چې نوماندانو ته د بري مبارکۍ ورکوي، نیوکې کړې او په کلکه یې غوښتنه کړې چې د رسمي شمېرو او پایلو تر اعلان وړاندې، غیر مسولانه څرګندونې ونه کړي.
د ټاکنو خپلواک کمېسیون مني چې په دا ځل ټاکنو کې د تېرو ټاکنو په پرتله، د خلکو ګډون کمرنګه و، خو په خبره یې ټاکنې شفافې دي او هېڅ ډول خیالي رایې نه دي کارول شوې. د ټاکنو کمېسیون د کمیشنرانو په خبره، په ځینو مرکزونو کې چې رایې او صندقونه تر دې دمه پاتې دي، د لاسوهنې وړ نه دي او که څوک د تقلب هڅه وکړي، نو کمېسیون یې په اسانۍ سره پېژندلی شي.
د ټاکنو خپلواک کمېسیون مشرې حوا علم نورستانۍ بیا په دې خبري کنفرانس کې وویل، چې ټولې رایې مرکز ته د رسېدو په حال کې دي او سر له سبا به د ټاکنو په خپلواک کمېسیون کې د رایو شمېرنه پيل شي. د نوموړې په خبره، په لومړي سر کې د کابل رایې شمېرل کېږي او تر هغه به د نورو مرکزونو رایې هم کابل ته را ورسېږي.
سره له دې چې د ټاکنو خپلواک کمېسیون د شفافیت ډاډ ورکوي، خو ځینو نوماندانو او ټاکنیزو فعالانو د ټاکنو د شفافیت په اړه اندېښنه ښودلې ده. ځینو نوماندانو له رسنیو سره په خبرو کې ویلي وو، چې په ټاکنو کې د منظم تقلب لپاره پلان جوړ شوی و او په ډېری مرکزونو کې پراخه درغلي شوې ده. د ټاکنو خپلواک کمېسیون بیا پر نوماندانو غږ کړی دی چې خپل شکایتونه او اسناد د ټاکنیزو شکایتونو له کمېسیون سره شریک کړي او دغه کمېسیون به د درغلیو او تخلف اړوند اسناد څېړي.
