امریکا: نوماندان دې د پایلو تر اعلان مخکې وړاندوینې نه کوي

د امریکا بهرنیو چارو وزارت په یوې خبرپاڼه کې د افغانانو شجاعت او دلاوري ستایلې او زیاته کړې یې ده چې د افغانستان خلکو له امنیتي ننګونو سره سره په ټاکنو کې برخه واخیسته. امریکا دغه راز د ټاکنو د امنیت په برخه کې د افغان ځواکونو او د ټاکنو کمیسیون د کارکوونکو قربانۍ هم ستایلې دي. خبرپاڼه کاږي، نوماندان باید د ټاکنو کمیسیون له لوري د پایلو تر اعلان مخکې ځانونه بریالي اعلان نه کړي. خبرپاڼه کې دغه راز راغلي، د ملي وحدت حکومت رهبران او ټاکنو کمیسیون دې خلکو ته حساب ورکوونکي اوسي، څو پر دې پروسه د خلکو باور بېرته تر لاسه کړل شي. د خبرپاڼې په اخیري برخه کې د ټاکنو پر ورځ د طالبانو له لوري پر ټاکنیزو مرکزونو بریدونه هم غندل شوي دي.