د ولسمشریزو ټاکنو د پایلو په اړه هر نوماند تازه څرګندونې کوي. پرون رحمت الله نبیل په یوه خبري کنفرانس کې وویل، چې په لومړي پړاو کې هېڅ نوماند هم قانوني رایې نه دي پوره کړې، نو ټاکنې دویم پړاو ته ځي. د ولسمشریزو ټاکنو دغه نوماند همدا راز دا ادعا هم وکړه، چې حاکمو ټیمونو په ټاکنو کې پراخه درغلي کړې ده او باید ټاکنې په شفافه توګه وشمېرل شي. په ورته وخت کې د ټاکنو خپلواک کمېسیون بیا وایي، چې ټاکنیز ټیمونه د ټاکنو د پایلو په اړه باید نظر څرګند نه کړي. د کمېسیون په خبره، نوماندان دې د دوی پرېکړې ته په تمه شي. یوناما هم د ټاکنو کمېسیون دغه دريځ تایید کړی دی.
سره له دې چې د ټاکنو خپلواک کمېسیون، نوماندان د ټاکنو د پایلو په اړه له څرګندونو منع کړي، خو بیا هم ټاکنیز ټیمونه د ځان د بریا او نورو د ماتې په اړه نظرونه ورکوي. په تېرو دوو ورځو کې څو نوماندانو د ټاکنو د پایلو په اړه نظر څرګند کړی دی او ځانونه یې بریالي بللي دي. پرون تازه د ولسمشریزو ټاکنو نوماند رحمت الله نبیل بیا ویلي، چې ټاکنې به دویم پړاو ته لاړې شي. د ده په خبره، هېڅ نوماند پنځوس جمع یو رایه نه ده پوره کړې، نو ځکه د دې اړتیا ده چې ټاکنې دویم پړاو ته لاړې شي.
رحمت الله نبیل د ټاکنو پر کمېسیون هم غږ وکړ، چې پایلې دې ژر اعلان کړي او د دویم پړاو ټاکنو تر سره کولو ته دې تیاری ونیسي. د نوموړي په خبره، د دوی معلومات دا ښيي چې یوه نوماند هم ولسمشرۍ ته د رسېدو لپاره قانوني رایه نه ده پوره کړې، نو ځکه د دویم پړاو ټاکنو اړتیا شته ده.
رحمت الله نبیل پر هغو ټاکنیزو ټیمونو هم نیوکه وکړه، چې تر وخت مخکې یې خپله بریا اعلان کړې ده. نبیل وویل، دا له قانونه سرغړونه ده او د ټاکنو خپلواک کمېسیون یې باید تعقیب کړي. نوموړي پر دې هم ټینګار وکړ، چې یوازې بایومټریک شوې رایې باید وشمېرل شي او هغه رایې باید ټولې باطلې اعلان کړل شي، چې له بایومټرک پرته کارول شوې دي.
بلخوا د مشرانو جرګې د مشر تازه څرګندونو هم غبرګون پارولی دی. نوموړي ویلي، د ټاکنو کمېسیون باید بې بایومټریکه رایې هم وشماري او هغه دې نه باطلوي. نوموړي په یو ډول کمېسیون ته ګواښ کړی چې ارو مرو باید دغه ډول رایې سمې وګڼل شي. په همدې تړاو د ولسمشریزو ټاکنو نوماند عبدالله عبدالله غبرګون ښودلی دی. ده ویلي، قانوني مراجع باید د مسلمیار دغه څرګندونې تعقیب کړي او قانوني چلند دې ورسره وکړي. عبدالله عبدالله ویلي، هېڅوک له خپل قدرت او سیاسي موقف په استفادې د دې حق نه لري چې د ټاکنو خپلواک کمېسیون چارواکي وګواښي. عبدالله ويلي: ((مسلمیار باید د دغه ډول غیر مسوولانه څرګندونو له امله له ټاکنیزو کمېسیونونو بښنه وغواړي)).
د ولسمشریزو ټاکنو بل نوماند فرامرز تمنا بیا له کمېسیونه غوښتي چې تر ټاکلې نېټې دې مخکې د ټاکنو پایلې اعلان کړي. د نوموړي په خبره، په رامنځ ته شوې خلا کې ښایي د ولسواکۍ ضد کسان د خلکو اذهان مخشوش کړي او دا د هېواد په ګټه نه ده. تمنا دا هم ویلي چې د ټاکنیزو کمېسیونونو د غړو ګواښل هېچا ته د منلو نه دي.
د ټاکنو خپلواک کمېسیون غړو هم تېره ورځ ناوخته په یوه خبري کنفرانس کې وویل، چې بې بایومټریکه رایې دوی ته ارزښت نه لري او باطلې دي. د ټاکنو خپلواک کمېسیون غړو دا هم وویل، چې د ولسوالیو ټول ټاکنیز مواد د ولایتونو مرکزونو ته رسېدلي دي او د معلوماتو له مخې دوو میلیونو ۵۹۸ زرو او ۴۴۵ کسانو په ولسمشریزو ټاکنو کې برخه اخیستې ده.
په کابل کې د ملګرو ملتونو د مرستندویه دفتر مشر تادامیچي یاماموتو هم پر نوماندانو غږ کړی، چې د ټاکنو کمېسیون تر پرېکړې وړاندې دې د پایلو په اړه څرګندونې نه کوي. د ده په خبره، نوماندان دې پر کمېسیون باور ولري، ځکه دغه کمېسیون خپل کار په پوره شفافیت سر ته رسوي.
